داريعا نازاربايەۆا: مەملەكەتتىك قوردان تۇرعىن ءۇي الۋ كەزەگى 45 جىلعا دەيىن سوزىلىپ وتىر
بۇل تۋرالى كەشە «نۇر وتان» پارتياسىنىڭ ورتالىق اپپاراتىندا وتكەن «حالىقتى تۇرعىن ۇيمەن قامتاماسىز ەتۋ جاي- كۇيى مەن پەرسپەكتيۆالارى تۋرالى» پارلامەنتتىك تىڭداۋدىڭ ۇسىنىستارىن ىسكە اسىرۋ بارىسى تۋرالى» دوڭگەلەك ۇستەل وتىرىسىندا ق ر پارلامەنتى ءماجىلىسى ءتوراعاسىنىڭ ورىنباسارى داريعا نازاربايەۆا ايتتى.
«مەملەكەتتىك تۇرعىن ءۇي قورىنان بەرىلەتىن باسپانا كەزەگىنە بيىلعى 1 - قاڭتاردىڭ دەرەكتەرى بويىنشا 283109 ادام تىركەلگەن. مەملەكەتتىڭ جىلىنا 6 مىڭ پاتەر سالۋ قاجەت دەگەن جوسپارى بويىنشا كەزەكتەگى ەڭ سوڭعى ادام شامامەن 44-45 جىلدان كەيىن باسپانالى بولادى دەگەن ءسوز. بۇل بۇگىنگى كۇننىڭ شىندىعى، سوندىقتان ونى حالىققا جاسىرماي ايتۋ كەرەك. ولاردىڭ باسپانالى بولسام دەگەن ويىن ادەتتەن تىس ۇمىتتەندىرمەۋ قاجەت» ، - دەدى ول.
د. نازاربايەۆانىڭ ايتۋىنشا، دەپۋتاتتار ءبىر جارىم جىل بۇرىن حالىقتى باسپانامەن قامتاماسىز ەتۋدىڭ قاراپايىم ءارى ءتيىمدى تەتىگىن ۇسىنعان بولاتىن، الايدا جاعداي جاقسارعان جوق.
«ءبىز بۇگىن قانداي قورىتىندى شىعارا الامىز؟ وسى ءبىر جارىم جىل ىشىندە ءبىزدىڭ ۇسىنىستارىمىزدىڭ ءبىر دە بىرەۋى ورىندالمادى. ولار قاعاز بەتىندە سول كۇيى قالدى» ، - دەدى ءماجىلىس ءتوراعاسىنىڭ ورىنباسارى.
«ءبىز بۇگىندە مەملەكەتتىك قازىنانىڭ مۇمكىنشىلىگى شەكتەۋلى ەكەنىن، بەلگىلى ءبىر ماسەلەلەردىڭ بار ەكەنىن جاقسى بىلەمىز. دەي تۇرعانمەن، ءبىز بۇل ماسەلەنى شەشەتىن ايتارلىقتاي قاراپايىم ءارى اقىلعا قونىمدى جولدارىن ۇسىندىق. ياعني، تۇرمىسى ناشار وتباسىلارىنا ارنالعان ءۇشىنشى- ءتورتىنشى دەڭگەيدەگى قىمبات ەمەس باسپانالار، شاعىن وتباسىلىق جاتاقحانالار سالىپ، تيپتىك جوبالار جاساۋ قاجەت» ، - دەدى د. نازاربايەۆا.
ونىڭ ايتۋىنشا، بۇگىندە تەك ءتورت وبلىس پەن استانا جانە الماتى قالالارى عانا شاعىن وتباسىلىق تيپىندەگى باسپانا سالۋدى جوسپارلاۋدا. باسقا وبلىستار تۋرالى ەشقانداي اقپارات جوق.
ايتا كەتەيىك، دوڭگەلەك ۇستەلگە پارلامەنت دەپۋتاتتارى، جەلگىلىكتى جانە ايماقتىق اتقارۋشى ورگاندارىنىڭ جاۋاپتى قىزمەتكەرلەرى، ۇ ە ۇ مەن قۇرىلىس كومپانيالارىنىڭ وكىلدەرى قاتىستى.
اۆتور: ءابۋ- اسقار مەكەش ۇلى
