قوستانايلىقتار ارىس قالاسىنداعى 450 كوپقاباتتى ءۇيدى قالپىنا كەلتىرەدى

شتاب جۇمىسىمەن تانىستىرۋ ءۇشىن وبلىس اكىمى ارحيمەد مۇحامبەتوۆ جۋرناليستەرمەن كەزدەسۋ وتكىزدى، دەپ حابارلايدى قازاقپارات.

ارنايى قۇرىلعان شتاب قۇرامىنا وڭىردەگى بەلسەندى ازاماتتار ەنگىزىلگەن.

«مۇنداعى ماقسات - ۋاقىت وزدىرماي توتەنشە جاعدايعا تاپ بولعان ارىس تۇرعىندارىنا قولدان كەلگەنشە جاردەمدەسۋ. وسى وقيعادان كەيىن ءبىرىنشى كۇنى-اق كوپتەگەن مەملەكەتتىك مەكەمە، كاسىپورىندار ءبىر كۇندىك جالاقى اۋدارۋ ماسەلەسىن قولدادى. تەك قانا مەملەكەتتىك ورگانداردىڭ قىزمەتكەرلەرى زارداپ شەككەندەرگە 20 ميلليون تەڭگەدەن استام قارجى اۋداردى. قازىر يگى ءىس ودان ءارى جالعاسىپ جاتىر. بۇدان جەكەمەنشىك مەكەمەلەر دە باس تارتىپ جاتقان جوق. ماسەلەن، «قاراسۋ» حولدينگى 3,5 ميلليون تەڭگە، «ميلح» ج ش س 1 ميلليون تەڭگە، «ب ك-ستروي» قۇرىلىس كومپانياسى 2 ميلليون تەڭگە اۋداردى. سونداي-اق، «ولجا- اگرو» ج ش س، «بايان سۇلۋ» كونديتەر فابريكاسى ءتارىزدى ءىرى ءوندىرىس ورىندارى دا باستاماعا ءۇن قوسىپ جاتىر. قازىرگى تاڭدا تۇركىستان وبلىسىنا 20 توننا ۇن، 7 توننا ماكارون ونىمدەرى، «بايان سۇلۋ» اق 3 توننا كونتيدەرلىك ونىمدەر جونەلتتى»، - دەدى ارحيمەد مۇحامبەتوۆ باسپا ءسوز جيىنىندا.

ارنايى شتاب قۇرامىندا قازاقستاننىڭ ەڭبەك ەرى المات تۇرسىنوۆ، «اتامەكەن» ۇ ك پ و ف جەتەكشىسى ۆاسيلي روزينوۆ، «جاس قانات-2006» قۇس فاريكاسىنىڭ باسشىسى قايرات مايشەۆ، وبلىستىق ءماسليحاتتىڭ حاتشىسى سايلاۋبەك ەشانوۆ، «نۇر وتان» پارتياسى وبلىستىق بولىمشەسى ءتوراعاسىنىڭ ءبىرىنشى ورىنباسارى جاڭاباي بەيسەمبايەۆ سياقتى ەسىمى كوپكە بەلگىلى ازاماتتار بار.

ءوڭىر باسشىسى قوستاناي وبلىسىنىڭ ارىس قالاسىنداعى قيراپ، بۇلىنگەن 450 ءۇيدى قالپىنا كەلتىرىپ بەرەتىنىن ايتتى. قازىر وندا وبلىس اكىمىنىڭ ورىنباسارى سەرگەي كارپليۋك باستاعان دەلەگاتسيا جۇمىس ىستەپ جاتىر. ولار ءبىر اپتا ىشىندە قيراعان، بۇلىنگەن ۇيلەردىڭ شىعىنىن ەسەپتەپ، قۇرىلىس جۇمىستارىنا قانشا قاراجات قاجەت ەكەندىگىن انىقتايدى. سودان كەيىن قۇرىلىسشىلار ناقتى ىسكە كىرىسەتىن بولادى.

«قانداي جاعداي بولماسىن، ءبىز كومەك بەرۋگە دايىنبىز. قيىن ساتتە قول ۇشىن سوزۋ - پارىز. سوندىقتان، وسى ءساتتى پايدالانىپ مەن بارشا قوستانايلىقتاردى ارىستاعى اعايىنعا قارجىلاي قولداۋعا شاقىرامىن. بىرلىگى بەكەم ەل عانا العا وزادى»، - دەپ تۇيىندەدى وبلىس اكىمى.

سونداي-اق، وبلىستىق كاسىپوداقتار ورتالىعى «ءسابي» گۋمانيتارلىق كومەك بەرۋ اكسياسىنىڭ اياسىندا 1 جاسقا دەيىنگى بالالارعا قوستانايلىقتاردىڭ اتىنان قاجەتتى زاتتاردى جيناۋدى ۇيىمداستىرىپ، بارلىق قاجەتتى زاتتاردى بۇگىن تۇستەن كەيىن تۇركىستان وبلىسىنا اتتاندىردى. وندا بالالار تاعامى، گيگيەنالىق زاتتار، كيىم-كەشەكتەر بار.

تومەندە ارىستاعى زارداپ شەككەن اعايىنعا قارجىلاي كومەك بەرۋ ءۇشىن «زدوروۆە.kst»  قوعامدىق قورىنىڭ رەكۆيزيتىن ۇسىنىپ وتىرمىز.

ب ي ن 190140031149

ي ي ك كz 6010221000089191

«قازاقستان حالىق بانكى»  ا ق

ب ي ك HSBKKZKX

ك ب ە 16

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق- ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.

سونداي-اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى. تۇڭعىش پرەزيدەنتتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتىپ، وندا ارىس قالاسىنداعى احۋال تالقىلاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى