الدىن الا اقپارات: 443 مىڭ ازاماتتىڭ نەسيەسىن مەملەكەت پەن بانك جاۋىپ بەرەدى
«جاڭا جارلىققا ساي، نەسيە بورىشى وتەلەتىن حالىقتىڭ ساناتىن ايتتىق. ەڭبەك جانە حالىقتى الەۋمەتتىك قورعاۋ مينيسترلىگىنىڭ بازاسى بويىنشا قازاقستاندا جوعارىدا اتالعان سانات بويىنشا (كوپبالالى وتباسىلار، مۇگەدەك بالالارى بار وتباسىلار، جالعىز اسىراۋشىسىنان ايرىلعان وتباسىلار، اتاۋلى الەۋمەتتىك كومەك الاتىندار، جەتىم بالالار) 933 مىڭ ازامات بار. ولاردىڭ تولىق مالىمەتتەرى تىركەلگەن. سوندىقتان، ەكىنشى دەڭگەيلى بانكتەرمەن كەزدەسۋ كەزىندە كىمنىڭ نەسيە العانىن نەمەسە الماعانىن انىقتايمىز. البەتتە، 933 مىڭ ازاماتتىڭ ءبارى دە نەسيە العان جوق. الدىن الا اقپارات بويىنشا، مۇنداي ازاماتتاردىڭ سانى 443 مىڭ بولىپ وتىر»، - دەدى پرەمەر-ءمينيستردىڭ ورىنباسارى گۇلشارا ءابدىقالىقوۆا بۇگىن ۇكىمەتتىڭ باسپا ءسوز ورتالىعىندا.
ايتا كەتسەك، كەشە ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن. ەلىمىزدەگى الەۋمەتتىك تۇرمىسى تومەن توپتاعى ازاماتتار - كوپبالالى وتباسىلار، مۇگەدەك بالالارى بار وتباسىلار، جالعىز اسىراۋشىسىنان ايرىلعان وتباسىلار، اتاۋلى الەۋمەتتىك كومەك الاتىندار جانە جەتىم بالالار ءتۇرلى سەبەپتەرمەن قيىن جاعدايعا تاپ بولىپ، ءوز اتتارىنا العان نەسيەلىك مىندەتتەمەلەرىن ورىنداي الماي وتىر. تىكەلەي جانە اتاۋلى قارجىلاي كومەك رەتىندە جوعارىدا اتالعان ساناتتاعى ازاماتتار ءۇشىن مەملەكەت ەكىنشى دەڭگەيلى بانكتەر مەن شاعىن قارجى ۇيىمدارىنان الىنعان جالپى مولشەرى 300 مىڭ تەڭگەگە دەيىن نەگىزگى نەسيەنى جانە وعان ەسەپتەلگەن سىياقىنى وتەيدى.
