جاسى 42-دەن تومەن ادامدا شەشەككە قارسى يممۋنيتەت بولماۋى مۇمكىن
العاش رەت بۇل ۆيرۋس 1958 -جىلى نيگەريادا مايمىلدان انىقتالعاندىقتان اتاۋى سودان شىققان. دەگەنمەن، ونى نەگىزىنەن ەگەۋقۇيرىق سەكىلدى كەمىرۋشىلەر مەن ۇساق سۇتقورەكتىلەر تاراتادى. 1970 -جىلى كونگو دەموكراتيالىق رەسپۋبليكاسىندا العاش رەت مايمىل شەشەگىنىڭ ادامعا جۇعۋى تىركەلدى.
ادەتتە سيرەك كەزدەسەتىن بۇل ينفەكسيا افريكاداعى تروپيكالىق ورماندار ايماعىنان ءارى اسپايتىن. الايدا قازىر بۇل اۋرۋ وزگە قۇرلىقتارعا، اسىرەسە ەۋروپا ەلدەرىندە تەز تاراپ بارادى. سونداي- اق ونى جۇقتىرعان ادامدار اۆستراليا، ا ق ش، كانادا مەن مەكسيكادا دا انىقتالدى. مايمىل شەشەگىمەن اۋىرعان ناۋقاستىڭ دەنە قىزۋى كوتەرىلىپ، بۋىندارى اۋىرادى، دەنەسى بورتەدى. مامانداردىڭ ايتۋىنشا، ودان بىرنەشە اپتا ىشىندە ايىعىپ كەتۋگە بولادى.
دەگەنمەن، ءولىم كورسەتكىشى 10 پروتسەنتكە جەتۋى مۇمكىن. بۇل دەنساۋلىق ساقتاۋ سالاسى ناشار دامىعان افريكا ەلدەرىندەگى كورسەتكىش. دامىعان ەلدەردە ءولىم سانى بۇدان ەداۋىر تومەن بولاتىنى انىق. ال ماماندار مايمىل شەشەگى كوۆيد سياقتى پاندەمياعا ۇلاسپايتىنىنا سەندىرىپ وتىر. ويتكەنى ينفەكسيا جاقىن قارىم- قاتىناس جاساعاندا، ياعني تەرىمەن جاناسقاندا جۇعادى.
دەنيەل باۋش، ا ق ش تروپيكالىق مەديتسينا قوعامىنىڭ ساراپشىسى:
- اۋرۋدى جۇقتىرۋ سانى ءوسۋى مۇمكىن، ءبىراق ونداعان مىڭعا دەيىن جەتپەيدى. جۇرتتىڭ بۇعان الاڭداۋعا نەگىزى جوق. بۇل كەلەسى كوۆيد بولمايدى. دەگەنمەن، قاۋىپسىزدىكتىڭ قاراپايىم ەرەجەلەرى مەن تازالىقتى ساقتاعان ءجون.
ازىرگە مايمىل شەشەگىنە قارسى ءتيىمدى ەم مەن ۆاكسينا تابىلعان جوق. الايدا كادىمگى شەشەككە قارسى ەكپەنىڭ كومەگى تيۋى مۇمكىن دەيدى ماماندار. ءبىراق كادىمگى شەشەك ۆاكسينالاۋدىڭ ارقاسىندا وسىدان جارتى عاسىر بۇرىن جويىلعان جانە ەكپە سالۋ 1980 -جىلدان بەرى توقتاتىلدى. بۇل 42 جاستان كىشى ءبىر دە ءبىر ادامنىڭ وسى اۋرۋعا قارسى يممۋنيتەتى جوق دەگەندى بىلدىرەدى. يسپانيا، ا ق ش پەن گەرمانيا مايمىل شەشەگى اۋرۋىنا قارسى ۆاكسينا ساتىپ الۋعا نيەتتى. ازىرگە ۆيرۋسقا قارسى ماقۇلدانعان ارنايى ەكپە جوق. قازىر امەريكالىق مودەرنا كومپانياسى ۇسىنعان نۇسقاسىن كلينيكالىق زەرتتەۋدەن وتكىزە باستادى.
www.24.kz
