استانادا سالىق زاڭدىلىعىن ساقتاماعان 42 ءارتىس جاۋاپكەرشىلىككە تارتىلدى
«استانادا سالىق تولەۋدەن جالتارعانى ءۇشىن قانداي ارتىستەر جاۋاپكەرشىلىككە تارتىلدى؟» دەگەن ساۋالعا دەپارتامەنت وكىلدەرى «استانا قالاسىنىڭ مەملەكەتتىك كىرىستەر ورگاندارى 2014-جىلى سالىق ەسەبى فورمالارىن دەر كەزىندە ۇسىنباۋ، پاتەنت الۋدا ەسەپتى جاريا ەتپەۋ، سالىق ورگاندارىنىڭ تالابىن ورىنداماۋ، زەينەتاقى جانە الەۋمەتتىك اۋدارىمداردى ۋاقىتىندا جولداماۋ سياقتى سالىق سالاسىنىڭ ءتۇرلى زاڭ بۇزۋشىلىقتارى ءۇشىن 42 سالىق تولەۋشىنى جاۋاپكەرشىلىككە تارتتى»، - دەگەن جاۋاپ قايتاردى.
مامانداردىڭ مالىمەتىنشە، بۇل 42 سالىق تولەۋشى - دەمالىس پەن ويىن-ساۋىق ۇيىمداستىرۋدى جانە باسقا دا قىزمەتتەردى ۇسىناتىن جەكە كاسىپكەر رەتىندە تىركەلگەن ادامدار. استانادا وسى قىزمەت ءتۇرى بويىنشا بارلىعى 399 سالىق تولەۋشى تىركەلگەن. 2014-جىلى ولاردان بيۋجەتكە 43,1 ميلليون تەڭگە سالىق ءتۇستى، ياعني ءبىر ارتىسكە ورتاشا ەسەپپەن 107,9 مىڭ تەڭگەدەن كەلدى. «مەملەكەتتىك كىرىستەر ورگاندارى سالىق تولەۋشى ارتىستەردىڭ سالىق ەسەبى فورمالارىن ۇسىنۋىنا، سالىق ەسەپتەرىنىڭ تولىقتىعىنا جانە بيۋجەتكە سالىق تولەۋىنە تۇراقتى تۇردە تالداۋ جۇرگىزىپ وتىرادى»، - دەپ حابارلادى دەپارتامەنتتىڭ باسپا ءسوز قىزمەتى.
مەملەكەتتىك كىرىستەر دەپارتامەنتى جەكە كاسىپكەرلەردىڭ جىلدىق جيىنتىق تابىسىنىڭ سالىق سالىنبايتىن مولشەرى قانداي بولاتىنىن ەسكە سالدى. ق ر سالىق جانە بيۋجەتكە تولەنەتىن باسقا دا مىندەتتى تولەمدەر تۋرالى كودەكسىنىڭ 157-بابىنا سايكەس، ول كۇنتىزبەلىك جىلدا رەسپۋبليكالىق بيۋجەت تۋرالى زاڭدا بەلگىلەنگەن جانە تيىستى قارجى جىلىنىڭ 1- قاڭتارىندا قولدانىستا بولاتىن ەڭ تومەنگى جالاقىنىڭ 12 ەسەلەنگەن مولشەرىنە تەڭ. 2015-جىلدىڭ 1- قاڭتارىنان باستاپ، ەڭ تومەنگى جالاقى مولشەرى - 21364 تەڭگە.
دەپارتامەنت وكىلدەرىنىڭ مالىمەتىنە قاراعاندا، ارتىستەر اراسىندا ەشكىم سالىقتان جالتارىپ قالا المايدى. «استانانىڭ مەملەكەتتىك كىرىستەر ورگاندارى سالىق تولەۋشىلەر مەن مەملەكەتتىك ورگانداردان الىنعان مالىمەتتەردى جانە باسقا دا قۇجاتتارعا تالداۋ جۇرگىزەدى. سونىڭ ناتيجەسىندە قاۋىپتەردى باسقارۋ جۇيەسىنە سايكەس سالىق تەكسەرۋىن جۇرگىزۋگە سالىق تولەۋشىلەر ىرىكتەلەدى»، - دەپ حابارلايدى مەملەكەتتىك كىرىستەر دەپارتامەنتىنىڭ باسپا ءسوز قىزمەتى.
ەسكە سالا كەتەيىك، بۇعان دەيىن سالىق ورگاندارىنىڭ وتاندىق شوۋ-بيزنەس وكىلدەرىنىڭ جىلدىق تابىسىن باقىلاۋدى كۇشەيتەتىنى حابارلانعان ەدى. جىلدىق تابىسى 250 مىڭ تەڭگەدەن اساتىن ارتىستەر جەكە كاسىپورنىن تىركەپ، بيۋجەتكە ءتيىستى سالىعىن تولەۋى كەرەك. ءبىراق ونەر يەلەرىنىڭ كوبى زاڭنىڭ بۇل تالابىن ەسكەرە بەرمەيدى.
