قازاقستاننان ينچحونعا 420 ۇكىلى ءۇمىتىمىز اتتانادى

ۇيىمداستىرۋ كوميتەتىنىڭ مالىمەتىنە قاراعاندا، بۇل جولعى ازيا ويىندارىنا قۇرلىقتىڭ 45 ەلىنەن 13000 سپورتشى مەن جاتتىقتىرۋشى قاتىسپاق. ازيا ويىندارى بارىسىن بۇقارالىق اقپارات قۇرالدارىنىڭ 7000 وكىلى قاداعالايتىن كورىنەدى.

وسىدان ءتورت جىل بۇرىنعى قىتايدىڭ گۋانجوۋ قالاسىندا وتكەن ويىندارمەن سالىستىرعاندا جارىس باعدارلاماسىنا بۇل جولى ءبىرقاتار وزگەرىستەر ەنىپتى. ايتالىق، بيىلعى باعدارلامادان قىتايدا وتكەن ويىنداردا قازاقستاندىق سپورتشىلار چەمپيون جانە جۇلدەگەر بولعان سپورت تۇرلەرىنەن شاحمات، سپورتتىق بي سىندى تۇرلەرى الىنىپ تاستالعان.

اتالعان ويىندار باعدارلاماسىنا 41 وليمپيادالىق جانە 9 وليمپيادالىق ەمەس سپورت تۇرلەرى - بارلىعى 50 سپورت ءتۇرى ەنگەن. سونىمەن ينچحوندا وتەتىن XVII جازعى ازيا ويىندارىندا جالپى 439 مەدال جيىنتىعى ساراپقا سالىنادى.

قازاقستان سپورتشىلارىنىڭ الدىنا جالپى كوماندالىق ەسەپتە 4- ورىندى يەلەنۋ مىندەتى قويىلىپ وتىر. بۇل كورسەتكىشكە قول جەتكىزۋ ءۇشىن كەمىندە 20 دان استام التىن مەدال جەڭىپ الۋلارى كەرەك.

تاعى ءبىر اتاپ وتەرلىگى، XVII جازعى ازيا ويىندارىندا قازاقستان كومانداسى 11 سپورت تۇرىنەن جارىسقا قاتىسپايدى. ونىڭ ىشىندە 7 سپورت ءتۇرى ءبىزدىڭ ەلدە ءالى تارالماعان سپورت تۇرلەرى. ولار - سوفت تەننيس، كاباددي، كريكەت، سكۆوش، سەپاكتاكروۋ، بەيسبول، ۆمح. وسى اتالعان سپورت تۇرلەرىنەن 25 مەدال جيىنتىعى ساراپقا سالىنادى. بوۋلينگ، بادمينتون، سۋعا سەكىرۋ جانە فۋتبولدان (قازاقستان ۋ ە ف ا-دا ونەر كورسەتەدى) 38 مەدال جيىنتىعى وينالادى.

وسى سپورت تۇرلەرىن ەسەپتەگەندە، سونداي-اق ءجۇزۋ، جەڭىل اتلەتيكا جانە باسقا دا سپورت تۇرلەرى بويىنشا كوماندا قۇرامدارى تولىق جاساقتالماعان سەبەپتى قازاقستاندىق سپورتشىلار 120 مەدال جيىنتىعى ساراپقا سالىناتىن سىندارعا قاتىسا المايدى.

سوندىقتان ەل نامىسىن قورعايتىن سپورتشىلارىمىزعا قويىلاتىن تالاپ تا اۋىر. جالپى كوماندالىق ەسەپتە 4-ورىن الۋ ءۇشىن بار ونەرىن سالىپ، جانتالاسۋى قاجەت.

قازىرگى بىزگە كەلىپ جەتكەن اقپاراتقا سۇيەنسەك، ساپالى دايىندالۋ ماقساتىندا بۇگىنگى تاڭدا 94 سپورتشى جانە جاتتىقتىرۋشىمەن كەلىسىمشارت جاسالعان. بۇلار لوندون وليمپياداسىندا جانە سوڭعى ەكى جىل بويى جوعارى ناتيجە كورسەتىپ جۇرگەن سپورتشىلار.

ەستەرىڭىزگە سالا كەتەيىك، گۋانجوۋداعى وتكەن ازيا ويىندارىندا ەلىمىزدىڭ نامىسىن 36 سپورت تۇرىنەن 362 سپورتشى قورعاعان بولاتىن. وندا سپورتشىلار سانى جاعىنان ازيا ەلدەرى ىشىندە 9- كورسەتكىشكە قول جەتكىزگەن ەدى. بۇل جولى ينچحونعا ءبىزدىڭ 420 سپورتشىمىز 39 سپورت تۇرىنەن ەل نامىسىن قورعاۋعا اتتانعالى وتىر. ولاردىڭ 207 ءسى ەر سپورتشىلار بولسا، 213 ءى نازىك جاندىلار.

بيىلعى قازاقستان نامىسىن قورعايتىن سپورتشىلارىمىزدىڭ ورتاشا جاسى - 24.5. ەڭ جاس سپورتشى - 15 جاسار كسەنيا كوندراتەنكو (ەسكەك ەسۋ سلالومى). ەڭ ەگدە سپورتشىمىز نۇرلان ماقۇلبەكوۆ (گولف) - 59 جاستا.

بيىلعى دەلەگاتسيانىڭ قۇرامىندا 1998-2010-جىلدارداعى ازيا ويىندارىنىڭ 17 چەمپيونى بار. ونىڭ 7 ءى گۋانجوۋداعى چەمپيوندار: و. رىپاكوۆا (جەڭىل اتلەتيكا)، م. مۇقاشيەۆا (جەڭىل اتلەتيكا)، د. كارپوۆ (جەڭىل اتلەتيكا)، د. ەلەۋسىنوۆ (بوكس)، د. ءاسادىلوۆ (كاراتە)، ر. ساعىندىقوۆ (كاراتە)، ن. تىناليەۆ (گرەك-ريم كۇرەسى).

ينچحوندا ونەر كورسەتەتىن سپورتشىلاردىڭ سانى بويىنشا وڭىرلەر اراسىندا الماتى كوش باستادى. ءبىر عانا الماتى قالاسىنىڭ وزىنەن 111 سپورتشى (23 سپورت ءتۇرى) ونەر كورسەتەتىن بولسا، ەكىنشى كورسەتكىشتە ەلوردالىق سپورتشىلار تۇر. استانا قالاسىنان 63 ساڭلاعىمىز 22 سپورت تۇرىنەن باق سىنايدى. ال وڭتۇستىك قازاقستان وبلىسىنان 56 سپورتشى سپورتتىڭ 16 تۇرىنەن ەل نامىسىن قورعاۋعا اتتانعالى وتىر. الماتى وبلىسىنان 38 سپورتشى 13 سپورت تۇرىنەن باق سىنايتىن بولسا، قاراعاندى وبلىسى 29 سپورتشىسىن سپورتتىڭ 13 تۇرىنەن سىنعا تۇسۋگە اتتاندىرماق. ال پاۆلودار وبلىسى سپورتتىڭ 8 تۇرىنەن 20 سپورتشىسىنا ءۇمىت ارتىپ وتىر.

ءتورتجىلدىق دودانىڭ سالتاناتتى اشىلۋ راسىمىندە قازاقستان تۋىن بوكسشى لوندون وليمپياداسىنىڭ كۇمىس جۇلدەگەرى ادىلبەك نيازىمبەتوۆ ۇستاپ شىعادى. مۇنداي ەل نامىسى سىنعا تۇسەتىن بايراقتى باسەكەلەردە مەملەكەتتىك تۋىمىزدى كەز كەلگەن سپورتشىعا ۇستاتا سالمايتىنى بەلگىلى. دەمەك، ادىلبەككە ارتىلعان مىندەت تە اۋىر ەكەنى انىق.

الداعى 12- قىركۇيەك كۇنى ساعات 11:00-دە الماتى قالاسىنداعى بالۋان شولاق سپورت سارايىنىڭ ءماجىلىس زالىندا قازاقستان رەسپۋبليكاسىنىڭ مادەنيەت جانە سپورت مينيسترلىگى وكىلدەرىنىڭ قاتىسۋىمەن باسپا ءسوز ءماسليحاتى وتەدى. وسى كۇنى ادىلبەك نيازىمبەتوۆكە قازاقستان تۋىن ارنايى تاپسىرۋ ءراسىمى وتپەك. سونداي-اق، قازاقستان سپورتشىلارىن XVII جازعى ازيا ويىندارىنا شىعارىپ سالۋ سالتاناتى بولماق.

شىعارىپ سالۋ ءراسىمىنىڭ باعدارلاماسىندا: قازاقستاننىڭ رەسمي دەلەگاتسياسىنىڭ تۋ ۇستاۋشىسىنا تۋدى تاپسىرۋ، سپورتشىنىڭ انتىن قابىلداۋ ءراسىمى وتەدى دەپ اتاپ وتىلگەن. سونداي-اق، ب ا ق وكىلدەرى مەن جانكۇيەرلەر قازاقستان كومانداسىنىڭ سپورتشىلارىمەن فوتو سۋرەتكە تۇسۋگە، سۇحباتتاسۋ مۇمكىندىكتەرى بار دەپ اتاپ وتكەن.

ەندى جازعى ازيا ويىندارىنىڭ تاريحىنا كوز جۇگىرتەر بولساق، اتالمىش ءدۇبىرلى دودا 1951-جىلدان بەرى وتكىزىلىپ كەلەدى:

1951-جىلى، نيۋ-دەلي (ءۇندىستان) - 11 ەل قاتىستى، 6 سپورتتىڭ تۇرىنەن؛

1954-جىلى، مانيلا (فيليپپين) - 18 ەل، 8 سپورت ءتۇرى؛

1958-جىلى، توكيو (جاپونيا) - 20 ەل، 13 سپورت ءتۇرى؛

1962-جىلى، دجاكارتا (يندونەزيا) - 17 ەل، 13 سپورت ءتۇرى؛

1966-جىلى، بانگكوك (تايلاند) - 18 ەل، 14 سپورت ءتۇرى؛

1970-جىلى، بانگكوك (تايلاند) - 18 ەل، 13 سپورت ءتۇرى؛

1974-جىلى، تەگەران (يران) - 25 ەل، 16 سپورت ءتۇرى؛

1978-جىلى، بانگكوك (تايلاند) - 25 ەل، 19 سپورت ءتۇرى؛

1982-جىلى، نيۋ-دەلي (ءۇندىستان) - 33 ەل، 21 سپورت ءتۇرى؛

1990-جىلى، بەيجڭ (قىتاي) - 37 ەل، 27 سپورت ءتۇرى؛

1994-جىلى، حيروسيما (جاپونيا) - 42 ەل، 34 سپورت ءتۇرى؛

1996-جىلى، سەۋل (كورەيا) - 27 ەل، 25 سپورت ءتۇرى؛

1998-جىلى، بانگكوك (تايلاند) - 41 ەل، 36 سپورت ءتۇرى؛

2002-جىلى، بۋسان (كورەيا) - 44 ەل، 38 سپورت ءتۇرى؛

2006-جىلى، دوحا (كاتار) - 45 ەل، 47 سپورت ءتۇرى؛

2010-جىلى، گۋانجوۋ (قىتاي) - 45 ەل، 57 سپورت ءتۇرى.

قازاقستان سپورتشىلارى جازعى ازيا ويىندارىنا 1994-جىلدان باستاپ قاتىسا باستادى. سودان بەرى بەس جازعى ازيا ويىندارىنا قاتىسىپ، جالپى كوماندالىق ەسەپتە ءۇش رەت - ءتورتىنشى ورىنعا، ەكى رەت بەسىنشى ورىنعا يە بولدى.

بەس جازعى ازيا ويىندارىنداعى قازاقستان قۇراماسىنىڭ جەڭىپ العان مەدالدار سانى:

1994-جىلى،  حيروسيما (جاپونيا) -   25 التىن، 26 كۇمىس، 26 قولا، جالپى ەسەپتە 4- ورىن؛

1998-جىلى، بانگكوك (تايلاند) - 24 التىن، 24 كۇمىس، 30 قولا، جالپى ەسەپتە 5- ورىن؛

2002-جىلى،  بۋسان (كورەيا) - 20 التىن، 26 كۇمىس، 30 قولا، جالپى ەسەپتە 4- ورىن؛

2006-جىلى، دوحا (كاتار) - 23 التىن، 19 كۇمىس، 38 قولا، جالپى ەسەپتە 4- ورىن؛

2010-جىلى، گۋانجوۋ (قىتاي) - 18 التىن، 23 كۇمىس، 38 قولا، جالپى ەسەپتە 5- ورىن.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى