ۇزدىك دەپ تانىلعان 42 ۋنيۆەرسيتەتتىڭ 200 وقىتۋشىسىنا مەملەكەتتىك گرانتتار تابىستالدى

ءداستۇرلى سايىسقا وتكەن جىلى رەسپۋبليكانىڭ 90 جوعارى وقۋ ورنىنان 545 ۇمىتكەر قاتىسقان بولاتىن. ءبىلىم ءمينيسترى اتاپ وتكەندەي، «جوعارى وقۋ ورنىنىڭ ۇزدىك وقىتۋشىسى» مەملەكەتتىك گرانتىن يەلەنگەندەردىڭ باسىم دەنىن عىلىمي اتاعى بار وقىتۋشىلار قۇرايدى. اتاپ ايتقاندا، 70 پايىزعا جۋىعى پروفەسسورلار مەن عىلىم دوكتورلارى، قالعاندارى - دوتسەنتتەر، عىلىم كانديداتتارى جانە PhD دوكتورلارى.

ولاردىڭ اراسىندا استانالىق وقىتۋشىلار دا بار. سولاردىڭ ون ءتورتى ەلباسى نۇرسۇلتان نازاربايەۆ نەگىزىن قالاعان ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ءبىلىم بەرەدى. ولاردىڭ توعىزى - عىلىم دوكتورى، بەسەۋى - عىلىم كانديداتتارى. ماماندىقتارى دا ءار سالادان: فيزيكا-تەحنيكالىق، جاراتىلىستانۋ عىلىمدارى، الەۋمەتتىك عىلىمدار، ەكونوميكا، مەحانيكا-ماتەماتيكا فاكۋلتەتى. اتاپ ايتقاندا، گ. ايقىنبايەۆا، ر. بەرسىمباي، ج. ەرمەكوۆا، ە. جۋراۆليەۆا، س. قوجايەۆا، د. مادياروۆا، ر. ويناروۆ، ر. ورازبايەۆا، ك. ءسادۋاقاسوۆا، ت. سامۇراتوۆا، س. ساحيەۆ، م. سەرىك، س. تاجىبايەۆا، ا. تولەعۇلوۆ ق ر ب ع م- نىڭ گرانتىن يەلەنىپ، عىلىمي جاڭالىقتارىن ومىرگە ەنگىزۋگە مۇمكىندىك الدى، دەپ حابارلايدى اتالمىش ج و و باسپا ءسوز قىزمەتىنەن.

مەملەكەتتىك گرانت وتاندىق وقىتۋشىلارعا ۇلى بريتانيا، گەرمانيا، فرانسيا، يتاليا، يسپانيا، بەلگيا، پولشا، اۆستريا، بولگاريا، ليتۆا، لاتۆيا، رەسەي جانە تاعى باسقا مەملەكەتتەردىڭ جەتەكشى جوعارى وقۋ ورىندارىندا سىناقتان وتۋگە مۇمكىندىك بەرەدى. سونىمەن قاتار گرانت يەگەرلەرى ءبىر جىل بويى حالىقارالىق عىلىمي كونفەرەنتسيالارعا، سيمپوزيۋمدارعا، كونگرەسستەرگە، عىلىمي-زەرتتەۋ تاقىرىپتارىنا ارنالعان سەمينارلارعا قاتىسا الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى