قازاقستاندا 4110 ۇلى وتان سوعىسىنىڭ ارداگەرى بار - فوتو
كەزدەسۋ بارىسىندا گ. ءابدىقالىقوۆا ق ر پرەزيدەنتى ن. نازاربايەۆتىڭ تاپسىرماسى بويىنشا بۇگىن استانا، الماتى، قاراعاندى، پاۆلودار، تالدىقورعان جانە شىمكەنت قالالارىندا جەڭىس شەرۋلەرىنە قاتىسقان سوعىس ارداگەرلەرىن ماراپاتتاۋ شارالارى سالتاناتتى تۇردە وتكىزىلىپ جاتقانىن اتاپ ءوتتى. سونىمەن قاتار، مەملەكەتتىك حاتشى ۇلى جەڭىس ءۇشىن ارداگەرلەرگە شەكسىز ريزاشىلىعىن ءبىلدىرىپ، ولاردىڭ وتانىمىزدىڭ تاۋەلسىزدىگى جولىندا جاساعان وشپەس ەرلىكتەرى مەن تىلداعى قاجىرلى ەڭبەكتەرى جادىمىزدا ساقتالاتىندىعىن باسا ايتتى.
«بۇگىنگى كۇنى قازاقستاندا 4110 سوعىس ارداگەرلەرى، قاتىسۋشىلارى جانە مۇگەدەكتەرى بار. ەشكىم دە ەستەن شىعارىلعان ەمەس. سىزدەردىڭ بەيبىتشىلىك پەن كەلىسىم سىيلاعاندىقتارىڭىز ءۇشىن شەكسىز ريزاشىلىعىمدى بىلدىرگىم كەلەدى. سىزدەردىڭ سۇراپىل سوعىستاعى ەرلىكتەرىڭىز بەن جانقيارلىق ەڭبەكتەرىڭىزدى ەستەن شىعارماۋعا ءتيىسپىز. وسى ساتتى پايدالا وتىرىپ، سىزدەردى كەلە جاتقان ق ر تۇڭعىش پرەزيدەنتى كۇنىمەن قۇتتىقتايمىن. زور دەنساۋلىق، ۇزاق ءومىر تىلەيمىن»، - دەدى گ. ءابدىقالىقوۆا.
مەملەكەتتىك حاتشى «ەلباسى اتاپ كورسەتكەندەي، سوعىس ارداگەرلەرى مەن تىل ەڭبەككەرلەرىنە دەگەن قامقورىق مەملەكەتتىڭ ماڭىزدى مىندەتى بولىپ تابىلاتىنىنا» نازار اۋداردى. ماسەلەن، اعىمداعى جىلدىڭ 1- قاراشاسىنداعى جاعدايعا سايكەس، تەك قانا ءبىرجولعى ماتەريالدىق كومەك كورسەتۋگە جانە مەرەكەلىك ءىس-شارالارعا قاتىسۋ ءۇشىن مەملەكەتتىك بيۋدجەتتەن 7,7 ميلليارد تەڭگە بولىنگەن.
كەزدەسۋ بارىسىندا ارداگەرلەر ۇلت كوشباسشىسى ن. نازاربايەۆقا ۇدايى قامقورلىعى مەن ىقىلاسى ءۇشىن شىنايى ريزاشىلىقتارىن ءبىلدىردى. ولار ەلباسىنىڭ جۇرگىزىپ وتىرعان سارابدال ءارى سىندارلى ساياساتىن قولدايتىندىقتارىن اتاپ ءوتتى. سول ساياساتتىڭ ارقاسىندا ەلىمىزدە بەيبىتشىلىك، بىرلىك پەن كەلىسىم سالتانات قۇرىپ وتىرعاندىعىن ايرىقشا اتادى.
كەزدەسۋ سوڭىندا گ. ءابدىقالىقوۆا ارداگەرلەرگە ەلباسى ن. نازاربايەۆتىڭ ىزگى تىلەكتەرىن جەتكىزىپ، «سامۇرىق-قازىنا» ءۇ ا ق» ا ق تاراپىنان بولىنگەن ماسكەۋ جانە بەيجىڭ قالالارىندا وتكەن شەرۋگە قاتىسۋشى ارداگەرلەر ءۇشىن ارنايى اقشالاي سەرتيفيكاتتاردى تابىستادى.
ايتا كەتەيىك، ماسكەۋ مەن بەيجىڭدە وتكەن شەرۋگە ەلىمىزدىڭ ءارتۇرلى وڭىرىنەن 13 ارداگەر قاتىسقان بولاتىن.
اۆتور: مارلان جيەمباي
