قازاقستان تۇرمەدەگىلەر سانى بويىنشا الەمدە 41- ورىننان 47- ورىنعا ءتۇستى - جوعارعى سوت
كەڭەس بارىسىندا جوعارعى سوت ءتوراعاسى قازاقستانداعى تۇرمەدەگىلەر سانىنىڭ ازايۋ ءۇردىسىنىڭ ورىن الىپ وتىرعانىن اتاپ ءوتتى. ماسەلەن، بۇگىنگى كۇنى باس بوستاندىعىنان ايىرىلۋعا قاتىستى سوتتالعانداردىڭ ۇلەس سالماعى وتكەن جىلدىڭ العاشقى جارتىجىلدىعىمەن سالىستىرعاندا 11,5 پايىزعا ازايعان.
«تالداۋلار كورسەتكەنىندەي، سوتتار باس بوستاندىعىنان ايىرۋ ۇكىمدەرىن شىعارۋدى ازايتىپ، ونىڭ ورنىنا بالاما جازا تۇرلەرىن شىعارۋدى ارتتىرىپ وتىر. بۇل رەتتە سوتتالعانداردىڭ ۇلەس سالماعى بىلتىرعى جىلمەن سالىستىرعاندا 11,5 پايىزعا ازايدى، كەرىسىنشە، بالاما جازا تۇرلەرى بويىنشا شىعارىلعان ۇكىمدەر سانى 20 پايىزعا ارتتى. جازانىڭ بالاما ءتۇرىن قولدانۋدىڭ ارقاسىندا ءبىزدىڭ ەلىمىزدە سوتتالعاندار سانى ايتارلىقتاي ازايىپ وتىر»، - دەدى قايرات ءمامي.
سونىمەن قاتار باس پروكۋراتۋرانىڭ مالىمەتتەرىنە سۇيەنە وتىرىپ، جوعارعى سوت ءتوراعاسى قازاقستان العاش رەت تۇرمەدەگى ادامدار سانى رەيتينگىن 6 پوزيتسياعا جاقسارتقانىن اتاپ ءوتتى.
«ءبىز تۇرمە رەيتينگى بويىنشا 41- ورىننان 47- ورىنعا تۇستىك. بۇل مەملەكەت باسشىسىنىڭ قازاقستاندى تۇرمەدەگىلەر يندەكسى بويىنشا كوش باسىندا تۇرعان ەلۋ ەلدىڭ قاتارىنان شىعارۋ تۋرالى تاپسىرماسىنا سايكەس كەلەدى. ايتا كەتەرلىگى، تۇرمەدەگىلەر سانىنىڭ «كوشباسشى» ەلۋ ەلدىڭ تىزىمىنەن شىعۋ ءۇشىن بىزدە باس بوستاندىعىنان ايىرىلعاندار سانى 41 مىڭعا دەيىن ازايۋى ءتيىس. بۇگىنگى كۇنى ءبىزدىڭ باس بوستاندىعىنان ايىرۋ ورىندارىمىزدا 44,5 مىڭ ادام وتىر»، - دەدى ق. ءمامي.
