سينگاپۋردا 40 جىلدا العاش رەت جەمقورلىق داۋى تۋىندادى
وتكەن اپتادا جوعارى شەندى مينيستر جەمقورلىق ءىسى بويىنشا تۇتقىندالدى. بۇل - كەيىنگى 40 جىلدا ەلدە بولعان العاشقى جەمقورلىق داۋى جانە ول جەمقورلىققا قارسى بەدەلىمەن ماقتاناتىن قالا-مەملەكەتتىڭ تۇرعىندارىن ءدۇر سىلكىندىرگەن جاڭالىق بولدى.
وتكەن اپتادا سينگاپۋردىڭ جەمقورلىققا قارسى كۇرەس قىزمەتى كولىك ءمينيسترى س. يسۆاران مەن ميللياردەر ونگ بەنگ سەنگانى تۇتقىندادى. ەكەۋى 2008-جىلى سينگاپۋردە گران-پري وتكىزۋدە ماڭىزدى ءرول ويناعان. تەرگەۋ ءجۇرىپ جاتقاندىقتان يسۆاراننان مينيستر قىزمەتىنەن كەتۋى سۇرالعان.
Reuters دەرەگىنشە، 61 جاستاعى يسۆاران 2021-جىلدىڭ مامىرىندا كولىك ءمينيسترى بولعانعا دەيىن 2006-جىلى ۇكىمەت مۇشەسى اتانىپ، ساۋدا جانە بايلانىس ءمينيسترى قىزمەتىندە بولعان.
سينگاپۋردا مينيسترلەرگە قاتىستى جەمقورلىق ءىسى سيرەك كەزدەسەدى. سەبەبى، وندا مەملەكەتتىك قىزمەتشىلەر جەمقورلىققا قارسى تۇرۋى ءۇشىن جاقسى جالاقى تولەنەدى. كابينەت مۇشەلەرىنىڭ كوبىنىڭ جىلدىق جالاقىسى 1 ميلليون سينگاپۋر دوللارىنان (750 مىڭ ا ق ش دوللارىنا جۋىق) اسادى.
پرەمەر-ءمينيستردىڭ ورىنباسارى لوۋرەنس ۆونگ جەرگىلىكتى ب ا ق- قا بەرگەن سۇحباتىندا بۇل ءىستى تەرگەۋ «تولىق ءارى تاۋەلسىز» بولاتىنىن، «ەشتەڭە جاسىرىن قالمايتىنىن» ايتتى.
تاعى ءبىر جانجال سينگاپۋردىڭ ساياسي ساحناسىن وسى اپتادا ءدۇر سىلكىندىردى. پارلامەنت دەپۋتاتتارىنىڭ رومانى بەلگىلى بولىپ، ەكەۋى دە قىزمەتىنەن كەتۋگە ءوتىنىش جازدى جانە باسقارۋشى پارتيا قۇرامىنان دا شىقتى. ونىڭ ءبىرى - كەزىندە پرەمەر-مينيسترلىككە ۇمىتكەر سانالعان 54 جاستاعى پارلامەنت سپيكەرى تان چۋان-تسزين، ەكىنشىسى - ارىپتەسى 47 جاستاعى چەنگ لي حۋەي. تان مىرزانىڭ ايەلى بار ەكەنى بەلگىلى، ال چەنگ حانىم تۇرمىستا ەمەس.
ساراپشىلاردىڭ پىكىرىنشە، ءبىرىنىڭ ارتىنان ءبىرى بولىپ جاتقان داۋ-داماي 1959-جىلدان بەرى بيلىك باسىندا وتىرعان جانە پارلامەنتتىڭ باسىم بولىگىن قۇرايتىن حالىقتىق ارەكەت باسقارۋشى پارتياسىنىڭ بەدەلىنە نۇقسان كەلتىرۋى مۇمكىن.
