فرانسياداعى نارازىلىقتا ءتارتىپ ورناتۋ ءۇشىن 40 مىڭ پوليتسيا قىزمەتكەرى جۇمىلدىرىلدى

بۇل تۋرالى ەلدىڭ ىشكى ىستەر ءمينيسترى جەرالد دارمانەن 29-ماۋسىم، بەيسەنبى كۇنى مالىمدەگەن، دەپ حابارلايدى قازاقپارات Deutsche Welle-گە سىلتەمە جاساپ.

پاريج بەن ونىڭ شەتكى اۋماعىندا 5000 پوليتسيا قىزمەتكەرى كوشە ءتارتىبىن قاداعالايدى.

ەلدىڭ باس شاھارىندا اۆتوبۋس جەرگىلىكتى ۋاقىتپەن كەشكى 21:00-دە جۇمىسىن توقتاتاتىن بولدى. بيلىك مۇنى قوعامدىق كولىكتىڭ جۇمىسىنا جاۋاپتى كاسىپورىندار مەن جولاۋشىلاردىڭ قاۋىپسىزدىگىن قامتاماسىز ەتۋ ءۇشىن ىستەپ وتىرعانىن ايتتى.

كلامارداعى كومەندانتتىق ساعات

ەل استاناسىنان وڭتۇستىك - باتىسقا قاراي 10 ك م قاشىقتىقتا ورنالاسقان كلامار قالاسىندا كومەندانتتىق ساعات ەنگىزىلدى. ول 29-ماۋسىم مەن 3-شىلدە ارالىعىندا 21:00-دەن تاڭعى 06:00-گە دەيىن كۇشىندە بولادى.

جاپپاي تارتىپسىزدىك بۇل ەلدىمەكەندى دە اينالىپ وتپەدى، وتكەن تۇندە مۇندا ترامۆاي ورتەلدى.

150 ادام ۇستالدى

نارازىلىق نانتەر قالاسىندا 17 جاستاعى جاس ءوسپىرىم كولىك جۇرگىزىپ كەلە جاتىپ، ءتارتىپ ساقشىلارىنىڭ توقتا دەگەن بۇيرىعىن ەلەمەگەن سوڭ، پوليتسيا قىزمەتكەرلەرى ونى اتىپ ولتىرۋىنەن كەيىن تۋعان.

وقيعا ورنىنا جەدەل جەتكەن دارىگەرلەر جاس ءوسپىرىمنىڭ ءومىرىن قۇتقارىپ قالا المادى. قۇقىق قورعاۋ ورگاندارى وقيعانىڭ ءمان-جايىن انىقتاۋ ءۇشىن تەرگەۋدى باستاپ كەتتى.

وقيعانىڭ ۆيدەوسى الەۋمەتتىك جەلىگە تاراپ كەتكەن. سول كۇنى-اق پاريج ماڭىندا نارازىلىق اكسياسى ءوتىپ، كەيىن باسقا قالالارعا دا تارادى. 29-ماۋسىم كۇنگى تاڭداعى دەرەك بويىنشا، شەرۋگە شىققان 150 ادام ۇستالعان.

جاسوسپىرىمگە وق اتتى دەگەن كۇدىكپەن پوليتسيا قىزمەتكەرى قاماۋعا الىندى. وعان قاساقانا كىسى ءولتىردى دەگەن ايىپ تاعىلىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى