جەكە سوت ورىنداۋشىلار كەپىلدىككە قويىلعان 40 ءۇيدى ءبىر-اق ادامعا ساتقان

ۇيلەردى نارىقتاعى باعادان 5 ەسە ارزانعا ساۋدالاعان. ال بۇعان باسپاناسىنان ايرىلىپ قالعاندار بۇعان كۇدىكپەن قارايدى. مۇنىڭ ارتىندا ۇيىمداسقان قىلمىستىق توپ تۇر دەپ سانايدى. ءۇيىنىڭ اۋكسيونعا قويىلعانىن ءتىپتى ءۇي يەسى دە بىلمەي قالعان جاعدايلار كەزدەسكەن.

ماسەلەن، اقىلبەك ءسىلاموۆتىڭ 17 جىل تۇرعان ءۇيىن 5 ميلليون تەڭگە بەرەشەك ءۇشىن 5 ميلليون تەڭگەگە باعالاپ، ساتىپ جىبەرگەن.

پاۆلودار قالاسىنىڭ تۇرعىنى اقىلبەك ءسىلاموۆ: «ءبىز اۋكسيوننىڭ وتكەنىن دە بىلمەي قالدىق. سوت ورىنداۋشىسى كەلىپ، ءۇيدى بوساتىڭىزدار دەگەندە عانا بىلدىك. كۋديەنكو دەگەن ازاماتقا 5 ميلليون تەڭگەگە ساتىپ جىبەرىپتى. ال، بۇل ءۇيدىڭ نارىقتاعى باعاسى 25-35 ميلليون تەڭگە تۇرادى»، - دەيدى. باسىنداعى باسپاناسىنان ايىرىلعان تۇرعىندار، ۇيلەرىنىڭ تىم ارزانعا ساتىلعانىنا قارسى. ايتۋلارىنشا، 40 پاتەردى تەك ءبىر عانا ادام ساتىپ العان. اۋكسيونعا قويىلعان باسپانالار، نارىقتاعى باعادان 5 ەسەگە ارزان ساتىلعان. ال زاڭ بويىنشا ءۇيدىڭ باعاسىن تەك 25 پايىزعا عانا تۇسىرۋگە رۇقسات بەرىلىپتى.

پاۆلودار وبلىستىق مامانداندىرىلعان اۋدانارالىق اكىمشىلىك سوتىنىڭ سۋدياسى گۇلميرا ءجۇسىپوۆا: «ساتىلىمعا شىعارىلعان مۇلىكتىڭ باعاسى الدىمەن وسەدى. ال، ەكى مارتە ساتىپ الۋشى بولماسا وندا تۇسە باستايدى. ءبىراق نارىقتاعى قۇنىنان 25 پايىزعا عانا ارزان ساتىلۋى كەرەك. اكىمشىلىك ءىستى قاراعان كەزدە ساتىپ الۋشىنىڭ بىرنەشە اۋكسيونعا قاتىسقان كەزدەرى بولدى. زاڭدا وعان شەكتەۋ جوق»، - دەيدى.

ال جەكە سوت ورىنداۋشىلاردىڭ وڭىرلىك پالاتاسى بۇل ماسەلەگە قاتىستى قانداي دا ءبىر اقپارات بەرۋگە قۇلىقسىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى