بالالار ادەبيەتى جىلى - قازاقستاندىق جانە شەتەلدىك اۆتورلاردىڭ 40 كىتابى شىعارىلدى
«وزدەرىڭىزگە بەلگىلى، مەملەكەت باسشىسى قاسىم- جومارت توقايەۆ 2020 -جىلعى 22-قازاندا وتكەن ق ر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا زامانا كوشىنە بەيىمدەلگەن سانالى ۇرپاق تاربيەلەۋدە بالالاردىڭ كىتاپ وقۋعا قىزىعۋشىلىعىن ارتتىرۋ جانە قازاقستاندىق بالالار ادەبيەتى وكىلدەرىنە قولداۋ كورسەتۋ ايتىلدى. جاس جەتكىنشەكتەردى الەم بالالار ادەبيەتى شىعارمالارىمەن تانىستىرۋ تاپسىرماسىنا سايكەس، ءبىزدىڭ مينيسترلىك باستاماسىمەن 2021 -جىل «بالالار ادەبيەتى» جىلى بولىپ بەكىتىلگەن بولاتىن. وسى اتاۋلى جىل اياسىندا مينيسترلىك اۋقىمدى ءىس- شارالاردى جۇزەگە اسىردى. سونىڭ ءبىرى - بۇگىن تۇساۋى كەسىلىپ جاتقان 40 بالالار كىتابى»، - دەدى ق ر مادەنيەت جانە سپورت ءمينيسترى اقتوتى رايىمقۇلوۆا ەلورداداعى ق ر ۇلتتىق اكادەميالىق كىتاپحاناسىنداعى تۇساۋكەسەردە.
اتالعان باسىلىمدار مينيسترلىك باسپا سالاسىندا ۇيلەستىرەتىن «مادەنيەت جانە ونەر سالاسىنداعى باسەكەلەستىكتى جوعارىلاتۋ، قازاقستاندىق مادەني مۇرانى ساقتاۋ، زەردەلەۋ مەن ناسيحاتتاۋ جانە جانە مۇراعات ءىسىن ىسكە اسىرۋ تيىمدىلىگىن ارتتىرۋ» اتتى رەسپۋبليكالىق بيۋدجەتتىك باعدارلامانىڭ «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تارتۋ» اتتى كىشى باعدارلاماسى شەڭبەرىندە ارنايى لوگوتيپپەن جانە 120 مىڭ تيراجبەن باسىلعان جانە ەلىمىزدىڭ بارلىق كىتاپحانالارىنا تاراتىلعان.
«باسىلىپ شىققان ادەبيەتتەردىڭ 34 ى - وتاندىق قالامگەرلەر تۋىندىسى بولسا، التاۋى - الەم بالالار ادەبيەتىنىڭ اۋدارمالارى. اتاپ ايتقاندا، وتاندىق تانىمال اۆتورلار اقسەلەۋ سەيدىمبەك، گەرولد بەلگەر، نەسىپبەك ايت ۇلى، شاكەن كۇمىسباي ۇلى، ورازاقىن اسقار، سالىقباي ابدىلدابەك، ناعاشىبەك قاپالبەك ۇلى، سەرىك بايقونوۆ، سەرىك قالي ۇلى، زاريا جۇمانوۆا جانە باسقا دا تالانتتى اۆتورلاردىڭ شىعارمالارى. اۋدارما ادەبيەت اراسىندا جاپون بالالار ادەبيەتى دە بار، ونىڭ دا جاس وقىرماندار ءۇشىن تىڭ ءارى قىزىقتى شىعارما ەكەنىن اتاپ وتۋگە بولادى»، - دەدى ا. رايىمقۇلوۆا. مينيسترلىك وتاندىق قالامگەرلەردىڭ ادەبيەتتەرىن شىعارۋ بويىنشا مەملەكەتتىك قولداۋ تەتىگىن تۇراقتى نەگىزدە جۇزەگە اسىرىپ وتىرادى. جوعارىدا اتالعان كىشى باعدارلاما اياسىندا بيىل 168 اتالىممەن قوعامدىق ماڭىزى بار ادەبيەتتى جالپى تارالىمى 492 مىڭ دانامەن باسىپ شىعارىپ، رەسپۋبليكانىڭ مەملەكەتتىك كىتاپحانالارىنا تەگىن تاراتقان.
بالالار مەن جاسوسپىرىمدەرگە ارنالعان كەلەسى وتاندىق شىعارمالار جارىق كوردى: ق. ەرگوبەك «ادامنىڭ ءبىر قىزىعى بالا دەگەن...»، ا. راقىشيەۆا «بالالىقتىڭ سوڭعى كۇزى»، ب. قاراعىز ۇلى «ۇلى دالانىڭ ۇلاندارى»، ش. كۇمىسبايەۆ ء«سابي بولعىم كەلەدى»، ت. يۋپوۆ «ۇمىتپا ۇلىلاردىڭ ۇرپاعىسىڭ»، ت. بەيسەمبەك «زەرەك بالا»، س. ۇسەن «قىراننىڭ بالاپانى»، گ. اقجولوۆا «الدار كوسە»، س. بايحونوۆ «سارا اپامنىڭ ساباقتارى»، ا. سەيدىمبەك «الپامىس باتىر»، ءا. بەركىمبايەۆا «ءداۋىت اتايدىڭ ەرتەگىلەرى»، گ. اقجولوۆا «جاڭىلتپاشتار»، گ. شويبەكوۆا «تۇعىرىل حاننىڭ كوك تۋى»، ب. سارىباي «اقتابان»، ز. جۇمانوۆا «كۇلايشا، روكفەللەر»، ن. قاپالبەك ۇلى «بالالار الەمى»، ا. سوپىبەكوۆ «كوڭىلدى ءبىزدىڭ كۇنىمىز»، ءا. قالدىبايەۆ «ساعىندىم سەنى، ءىنىم!»، س. قالي ۇلى «قۇيعىت كانە، تۇلپارىم»، ك. ىبىراي «شۋاق»، س. وسپان «قوڭىراۋ»، و. اسقار «اۋىل بالالارى مەن قالا بالالارى»، ا. سارسەكوۆ «الاقاي!»، ءا. فايزۋللايەۆ «وتىرىك ايتپايتىن كۇن»، و. بايباق ۇلى «باسىرە»، ج. شاعاتاي «اۋىلدىڭ كىشكەنتاي ارحەولوگتارى»، ش. كۇمىسباي ۇلى «بابامداي بولعىم كەلەدى»، س. ابدىلدابەك «ايدانا مەن اقجولتاي»، ا. ومىربايەۆ «جاس جۇرەك»، ن. اقىش «تاۋ ىشىندەگى تاۋقىمەت» قازاق تىلدەرىندە ، ا. سەيدىمبەك «الپامىس»، گ. بەلگەر «ۆولك، چاپا ي درۋگيە» ورىس تىلدەرىندە جانە ن. ايت ۇلىنىڭ «ساياحاتشى شىبىن مۋحا- نەپوسەدا»، يۋري سەرەبريانسكي «قازاقستاندىق ەرتەگىلەر» قازاق- ورىس تىلدەرىندە شىقتى.
سونداي-اق الەم بالالار ادەبيەتى اۆتورلارىنىڭ قازاق تىلىندەگى اۋدارمالارى جارىق كوردى، سونىڭ ىشىندە جاپون بالالار ادەبيەتى جاس وقىرماندار ءۇشىن قىزىقتى ءارى تىڭ شىعارما ەكەنىن اتاپ وتۋگە بولادى: كاستريۋچين ۆ. ا. «ەرجۇرەك قۇمىرسقا»، ستيۆەنسون روبەرت ليۋيس «قازىنا ارالى»، دانيەل دەفو «روبينزون كرۋزو»، دجوناتان سۆيفت «گۋلليۆەردىڭ ساياحاتتارى»، «جاپون بالالار ادەبيەتىنىڭ اۋدارمالارى» 1-تومى قازاق تىلدەرىندە جانە اعىلشىن تىلىنەن اۋدارعان. ە. پودرەزوۆوي «دينوزاۆرى» (ورىس تىلىندە).
