تارازدا 40 ەلدىڭ ديزاينەرلەرى قاتىسىپ جاتقان حالىقارالىق ءسان اپتالىعى وتۋدە
«Aspara fashion week» جوباسى مەركى اۋدانىندا وتۋدە. بۇل شارا الەمنىڭ 40 ەلىنەن ءسان كيىم ۇلگىلەرىن جاسايتىن 100 ديزاينەرلەردى جانە تانىمال 30 ءسان بلوگەرلەرىن سونداي- اق جۋرناليستەر، ەۋروپا مەن ازيا ءسان اپتالىعى باسشىلارىنىڭ باسىن قوسىپ وتىر. بۇل - ءسان اپتالىعىنىڭ التىنشى ماۋسىمى. بيىل الەمدە قالىپتاسقان جاعدايعا بايلانىستى ونلاين فورماتتا ۇيىمداستىرىلعان ءسان اپتالىعىن سانسۇيەر قاۋىم قازاننىڭ 10-ىنا دەيىن ونلاين رەجيمدە ZOOM جەلىسىندە، Aspara Fashion Week, Youtube كانالى، Instagram, Facebook جانە Aspara Fashion Week پاراقشالارىندا تىكەلەي ەفيردە تاماشالاي الادى.
شاراعا وتاندىق ماماندارىنان بولەك، شەتەلدىك ديزاينەرلەر كوپتەپ تارتىلعان. ولارعا قازاقستاندىق ءسان ۇلگىسى مەن تىڭ تۋىندىلار تىكەلەي ەفيردە قاشىقتان تانىستىرىلادى. ءساندى جوبا الەم ديزاينەرلەرىنىڭ قىزىعۋشىلىعىن تۋدىرىپ وتىر. سالتاناتتى شارانى ونلاين تاماشالاپ، تىكەلەي بايلانىسقا شىققان وبلىس اكىمى بەردىبەك ساپاربايەۆ، ءسان مەرەكەسىنىڭ اشىلۋىمەن قۇتتىقتاپ، جىلى لەبىزىن ءبىلدىردى.
اپتالىقتىڭ العاشقى كۇنى قىتاي مەن وڭتۇستىك- شىعىس ازيا ەلدەرى سينگاپۋر، يندونەزيا، ميانما، فيليپپين، تايلاند، مالايزيا، برۋنەي، لاوس، كامبودجا، ۆەتنامنان كەلگەن 30 ديزاينەر ءوز كوللەكتسيالارىن ۇسىندى. ەكىنشى كۇنى قازاقستان مەن قىرعىزستان، وزبەكستان مەن تۇركىمەنستان جانە تاجىكستاندىق 22 ديزاينەر كيىمدەرىن كورسەتسە، ءۇشىنشى كۇنى كورەرمەن ەۋروپا، افريكا جانە امەريكا قۇرلىعىنان كەلگەن 20 ديزاينەردىڭ كوللەكسيالارىن تاماشالايدى دەپ كۇتىلۋدە. ولار بىرىككەن اراب امىرلىكتەرى، ۇلى بريتانيا، يتاليا، ارگەنتينا، ۆەنگريا، شۆەتسيا، ا ق ش، كەنيا، ماروككو، سەربيا، فرانسيا، يسپانيا، ساحا رەسپۋبليكاسى، كيپر، مولدوۆا، گوللانديا، ۋكراينا جانە ەفيوپيا ءسان شەبەرلەرى.
جىلىنا ءبىر كەلەتىن ءسان مەرەكەسىنىڭ اشىلۋىنا شەتەلدىك ديزاينەرلەر دە ءوز قۇتتىقتاۋلارىن ونلاين جەتكىزدى. سونىڭ ءبىرى ەفيوپيالىق كيىم ديزاينەرى لۋليت اۋەل. ول ءوز سوزىندە قازاق سانگەرلەرىنىڭ تۋىندىلارىن جوعارى باعالايتىنىن اتاپ ءوتتى.
«ەفيوپيا دا قازاقستان سەكىلدى كوپۇلتتى ەل. مۇنى حالىقتىڭ مادەنيەتى مەن كيىمدەرىنەن انىق اڭعارۋعا بولادى. قازاق سانگەرلەرىنىڭ جۇمىسىمەن بۇرىننان تانىسپىن ءارى ماعان ەرەكشە ۇنايدى. مەن ءۇشىن بۇل ءسان اپتالىعى ونلاين بولسا دا جاڭا دۇنيەلەردى كورىپ، تانىسۋعا جانە جاڭا يدەيالاردى جۇزەگە اسىرۋعا ۇلكەن مۇمكىندىك بولايىن دەپ تۇر»، - دەيدى ول. ال، بەلگىلى وتاندىق ديزاينەر ايدارحان قالييەۆ شارانىڭ ماقساتى مەن ماڭىزىنا توقتالدى.
«ءبىزدىڭ ەڭ باستى ماقساتىمىز - قازاقستاندىق ديزاينەرلەردى الەمدىك نارىقتارعا، الەمدىك قاۋىمداستىققا تانىتۋ. تىكەلەي ەفيردە كورەرمەندەر وڭتۇستىك شىعىس جانە ورتالىق ازيا، ەۋروپا، امەريكا جانە افريكا ديزاينەرلەرىنىڭ شىعارماشىلىق توپتامالارىن تاماشالاپ قانا قويماي، سونىمەن قاتار مەركىنىڭ تابيعاتى مەن مادەنيەتىن عاجايىپتارىمەن تانىسا الادى»، - دەيدى ا. قالييەۆ.
اۆتور: سايا سەمباي
