اتىراۋعا الداعى كۇندەرى تاعى 40 توننا ءدارى-دارمەك جەتكىزىلەدى

اتىراۋعا ءدارى-دارمەكتەردىڭ كەزەكتى پارتياسى جەتكىزىلدى. 26- شىلدەدە تۇندە ەڭ قاجەتتى ءدارى-دارمەك تيەگەن تاعى ءبىر جۇك ۇشاعى رەسەيدەن اتىراۋعا كەلىپ قوندى. رەسەي اكەلىنگەن 20 تونناعا جۋىق ءدارى-دارمەكتىڭ ىشىندە انتيبيوتيك پەن دەنە قىزۋىن تۇسىرەتىن دارىلىك زاتتار بار.

ولار بىرنەشە كۇننىڭ ىشىندە قالا مەن اۋداندارداعى ءدارىحانالارعا جەتكىزىلەدى.

«سوڭعى ەكى اپتادا وڭىرىمىزگە 80 توننادان اسا ءدارى-دارمەك شۇعىل تۇردە جەتكىزىلدى. سوعان قاراماستان، ءبىراز ءدارىحانالاردا ۆيرۋسقا قارسى جانە قىزۋ تۇسىرەتىن ءدارى ءالى دە بولسا جەتكىلىكسىز ەكەنىن انىقتادىق. وسى ماسەلەنى شەشۋ ءۇشىن وبلىس اكىمىنىڭ تاپسىرماسىمەن «اتىراۋ» الەۋمەتتىك-كاسىپكەرلىك كورپوراتسياسى تاراپىنان ارنايى قاراجات ءبولىندى. ول اقشاعا ديستريبيۋتور كومپانيا كوتەرمە اينالىم قاراجاتىن قايتارۋ شارتىمەن تىكەلەي نيجني نوۆگورودتان 20 تونناعا جۋىق مەديكامەنتتىك زاتتار ساتىپ الىپ، بۇگىن اتىراۋعا جەتكىزدى»، - دەدى اتىراۋ وبلىسى اكىمىنىڭ ورىنباسارى ەرجان ءابىلحانوۆ.

ونىڭ ايتۋىنشا، اسپيرين، ازيتروميتسين، تسەفازولين، تسەفترياكسون، سيستەما قويۋعا ارنالعان سۇيىق جانە وفلوكساتسين سەكىلدى باسقا دا قاجەتتى دارىلىك زاتتار بار. وبلىس اكىمدىگىنىڭ ۇيىمداستىرۋىمەن الداعى 3-4 كۇن ىشىندە تاعى دا 40 توننا ءدارى-دارمەك كەلەدى دەپ كۇتىلىپ وتىر.

ەرجان ءابىلحانوۆتىڭ ايتۋىنشا، پرەپاراتتاردى جىلدام جەتكىزۋ ءۇشىن تشو كومپانياسى ۇشاق بەرىپ كومەكتەسكەن. سونىمەن قاتار، ول بۇل مەديتسينالىق پرەپاراتتاردىڭ گۋمانيتارلىق كومەك ەمەس ەكەنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى