قازاقستاندى الەمگە تانىتۋ ءۇشىن 40 جىل جۇمىس ىستەدىم - ەلباسى
ءوز سوزىندە ول تۋعان جەرىنە قۇرمەتىن جەتكىزە كەلە ەل باسقارعان كەزدەگى ەستەلىكتەرىمەن ءبولىستى.
«مەن دە سىزدەر سياقتى وسى جەردەن ءوسىپ، الەمنىڭ 170 ەلىن ارالادىم. 200 دەن استام پرەزيدەنتپەن كەزدەستىم. سونىڭ بارلىعى ەلدىڭ قامى ءۇشىن بولاتىن. 1979-جىلى ورتالىق كوميتەت حاتشىسى بولىپ كەلگەننەن بەرى قاراي 40 جىل ەل باسقارۋ ىستەرىندە جۇمىس ىستەدىم. قولىمنان كەلگەنشە كۇندىز-ءتۇنى جۇمىس جاساپ، قازاق ەلىن الەمگە تانىتۋعا تىرىستىم. سونىڭ ارقاسىندا ەشكىم بىلمەيتىن قازاقستان دۇنيەجۇزىنە بەلگىلى بولدى. قازاقستاندىقتاردىڭ بارمايتىن جەرى، دەمالمايتىن كۋرورتى جوق. بالالارى الەمدىك ج و و- دا ءبىلىم الىپ جاتىر، دەنساۋلىعىن تۇزەيمىن دەسە دە شەتەلدىك ەمحانالارعا بارۋدا. سونىڭ بارلىعى ەلدىڭ وركەندەۋى، مەملەكەت دارەجەسىنىڭ كوتەرىلۋىنىڭ ارقاسىندا. قازاقستان باسقالارمەن سالىستىرعاندا ۇلكەن ەل ەمەس. ءبىزدىڭ ەل قىتاي مەن رەسەي سياقتى الىپ مەملەكەتتەرمەن شەكتەسەدى. وڭتۇستىگىمىزدە يسلام مەملەكەتتەرى. ولاردىڭ اراسىندا 18 ميلليون حالىقپەن، جەرىمىز كەڭ بولسا دا ۇلكەن دەپ ايتا المايمىز. دۇرىس جۇرگىزىلگەن ساياساتتىڭ ارقاسىندا بارلىق مەملەكەتتەر قازاقستاندى سىيلايتىن بولدى. اعايىنارالىق تاتۋلىق ماسەلەسىنە كىرىستىك. ارقا توسىندە جاڭا ەلوردامىزدى سالدىق. ەلوردامىز الەمدىك جيىندار وتەتىن، تانىمال ورتالىققا اينالدى. قازاقستاننىڭ ورتالىعى قانداي بولسا، ەلى دە سونداي دەپ تۇسىنەدى»، - دەدى نۇرسۇلتان نازاربايەۆ.
