جىل باسىنان مەملەكەتتىك قىزمەتتەگى 40 باسشى ۇستالدى
بۇل تۋرالى بۇگىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ رەسمي وكىلى نۇرلان جاحين باسپا ءسوز ءماسليحاتىندا ءمالىم ەتتى، دەپ حابارلايدى قازاقپارات ءتىلشىسى.
«جالپى اعىمداعى جىلدىڭ 4 ايىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ سىبايلاس جەمقورلىققا قارسى قىزمەتى 1152 قىلمىستىق قۇقىق بۇزۋشىلىقتى تىركەدى. ونىڭ ىشىندە 820-سى نەمەسە 71 پايىزى سىبايلاس جەمقورلىققا قاتىستى قىلمىستار. قىلمىستاردىڭ 40 پايىزىن پاراقورلىق جانە 32 پايىزىن بيۋدجەتتىك قاراجاتتى ۇرلاۋ فاكتىلەرى قۇرايدى»، - دەدى ول اگەنتتىكتە وتكەن باسپا ءسوز ءماسليحاتى بارىسىندا.
ونىڭ ايتۋىنشا، رەسپۋبليكا بويىنشا سىبايلاس جەمقورلىق قىلمىستارىن جاساعان 390 ادام جاۋاپكەرشىلىككە تارتىلۋدا. ونىڭ 8 ءى رەسپۋبليكالىق، 32 ءسى وبلىستىق، 56 سى- قالالىق جانە اۋداندىق دەڭگەيدەگى باسشىلار. جەمقورلىق قىلمىستاردىڭ 139 ىن جەرگىلىكتى اتقارۋشى ورگانداردىڭ قىزمەتكەرلەرى جاساعان. ودان كەيىن ىشكى ىستەر ورگاندارى - 95، مەملەكەتتىك كىرىستەر ورگاندارى - 37 جانە اۋىلشارۋاشىلىعى قىزمەتكەرلەرى 21 قىلمىس جاساعانى انىقتالعان.
«انىقتالعان زالالدىڭ سوماسى بىلتىرعى مەرزىممەن سالىستىرعاندا 2 ەسە ارتىق. ياعني 4,2 ميلليارد تەڭگەنى قۇرايدى. زالالدى وتەۋ 2,5 ەسەگە ارتتى. سوماسى 636 ميلليون تەڭگەنى قۇرايتىن مۇلىككە تىيىم سالىندى. مەملەكەت باسشىسىنىڭ تاپسىرماسىنا سايكەس قىلمىستىق پروتسەستە جازالاۋ تومەندەتىلدى. ۇستالعان ادامداردىڭ سانى ەكى ەسەگە تومەندەدى، قاماۋعا الىنعانداردىڭ سانى 3 ەسەگە قىسقاردى، پاراقورلىق ءۇشىن سوتتالعانداردىڭ 68 پايىزى ەسەلەنگەن ايىپپۇل تولەۋگە تارتىلدى»، - دەدى نۇرلان جاحين.
اۆتور: مارلان جيەمباي
