قازاقستاندا 40 كۇندىك دايىندىق كۋرسىنان ءوتىپ اسكەري بيلەت الۋعا بولادى
وسكەمەن قالاسىندا قورعانىس مينيسترلىگىنىڭ اسكەري-تەحنيكالىق مەكتەبى 2013 -جىلدان بەرى جۇمىس ىستەيدى. اسكەر قاتارىنا ءارتۇرلى سەبەپتەرمەن بارماي قالعان 24-27 جاس ارالىعىنداعى جاس جىگىتتەر وسىندا كەلىپ، بەكىتىلگەن ۇلگىدەگى اسكەري بيلەتتى الىپ شىعۋىنا بولادى.
ول ءۇشىن ولار 40 كۇندىك اقىلى دايىندىق كۋرسىنان وتۋگە ءتيىس. كۋرستىڭ باعاسى 263 مىڭ تەڭگەنىڭ اينالاسىندا. سونىمەن قاتار ون سەگىزگە تولماعان بوزبالالار دا اسكەري دايىندىقتان وتە الادى. ولار ءۇشىن قىزمەتتىڭ بۇل ءتۇرى تەگىن.
«قازىر ءبىزدىڭ وبلىسقا 2018 -جىلدىڭ 15 -قاڭتارىنان س، ۆ كاتەگورياسىنداعى ون جۇگىزۋشىنى تەگىن وقىتۋعا تاپسىرىس ءتۇستى. ءتورت ايلىق كۋرستى بىتىرگەن بولاشاق جاۋىنگەرلەر اسكەري بورىشتارىن وتەۋگە قارۋلى كۇشتەردىڭ اۋە قورعانىسى بولىمدەرىنە شاقىرىلادى. ياعني، بولاشاق وتان قورعاۋشىلار كوكتەمگى شاقىرۋعا ىلىگەدى»، - دەيدى وسكەمەن قالالىق قورعانىس ىستەرى جونىندەگى باسقارماسى، اسكەري قىزمەتكە كەلىسىمشارت بويىنشا جيناۋ جانە اسكەرگە شاقىرۋ ءبولىمىنىڭ باسشىسى، اعا لەيتەنانت رۋسلان قاراحوجين.
ءبولىم باسشىنىڭ تۇسىندىرۋىنشە، وتباسى جاعدايىمەن نەمەسە باسقا دا سەبەپتەرمەن اسكەر قاتارىنا شاقىرىلۋى كەيىنگە قالدىرىلعان جاس جىگىتتەر اقىلى كۋرستى ءتامامداۋ ارقىلى اسكەري بيلەتكە قول جەتكىزە الادى. وسى بيلەتپەن كۋرسانتتار قۇقىق ورىندارىندا، مەملەكەتتىك قىزمەتتە، اسكەري بولىمشەلەردە كەلىسىمشارت نەگىزىندە جۇمىس ىستەي الادى. ءبىر جانە ودان كوپ بالاسى بارلار زاپاسقا الىنادى.
