قىتايدان كەلگەن قانداسىمىزعا 40 مىڭ دوللارى قايتارىلاتىن بولدى

  مالىمەت بويىنشا، وسى جىلدىڭ 4 - ساۋىرىندە قىتاي حالىق رەسپۋبليكاسىنان قازاقستانعا كوشىپ كەلگەن گۇلجان ءماۋىتحاننان شەكارانىڭ كەدەن بەكەتىندە دەكلاراتسيادا كورسەتىلمەگەن  40000 ا ق ش دوللارى الىنعان. گۇلجان ءماۋىتحان قىتايداعى ءوز ءۇيىن ساتىپ، وسى قاراجاتقا استانادان ءۇي ساتىپ الماقشى بولعان. ول شەكارا ارقىلى اقشالاي قاراجاتتى وتكىزۋ ەرەجەلەرىن بىلمەگەنىن تۇسىندىرگەن. ناتيجەسىندە، «ەكونوميكالىق كونتراباندا» بابى بويىنشا سوتقا دەيىنگى تەرگەۋ باستالعان. ناتيجەسىندە، زايسان اۋداندىق سوتى گۇلجان ءماۋىتحاندى كىنالى دەپ تانىپ،  40000 ا ق ش دوللارىن مەملەكەت پايداسىنا الۋ تۋرالى شەشىم شىعارعان.

 اپەللياتسيالىق ساتىدا سوت ءىسىن جۇرگىزۋ ءتىلى تۋرالى تالاپ ساقتالماعاندىقتان، شەشىم بۇزىلعان. شىعىس قازاقستان وبلىسىنىڭ پروكۋراتۋراسى وسى ءىستى مۇقيات زەردەلەپ: «گۇلجان ءماۋىتحاننىڭ ارەكەتتەرىندە قىلمىستىق قۇقىق بۇزۋشىلىقتىڭ قۇرامى بولماعانىن انىقتادى، سەبەبى گۇلجان ءماۋىتحان قىتايدان اقشالاي قاراجاتتى قۇپيا تۇردە اكەلۋ نيەتى بولماعان» دەگەن قورىتىندىعا كەلدى.

«بۇنداي شەشىم قابىلداۋعا - ەگدە جاسىندا قىتاي ەلىنەن اتامەكەنى قازاقستانعا قايتۋدى ماقسات ەتىپ، ءومىر بويى جيناعان دۇنيە مۇلىكتەرىن ساتىپ، ورالمان مارتەبەسىن الىپ، ەلىنە ورالعان گ. ءماۋىتحاندى «ەكونوميكالىق كونتراباندا» جاسادى دەپ ايىپتاپ، ونىڭ  40000 ا ق ش دوللارى كولەمىندەگى قاراجاتىن تاركىلەۋ ادىلەتسىز ەكەندىگى نەگىز بولدى»، دەلىنگەن اتالعان قاۋلىدا.

 اۆتور: ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى