قازاقستاندا جىلىنا 40 مىڭعا جۋىق ادام ينسۋلتقا شالدىعادى
ونىڭ ايتۋىنشا، قازىرگى كۇنى كەڭ تاراعان قاۋىپتى دەرتتەردىڭ ءبىرى - ينسۋلت بولىپ وتىر. جىل سايىن دۇنيەجۇزىندە بۇل دەرتكە شامامەن 15 ميلليون ادام ۇشىرايدى. سونىڭ 3-5 ميلليونى ومىردەن وزادى.
«قازاقستاندا جىلىنا 40 مىڭعا جۋىق ادام وسى ينسۋلتقا شالدىعادى. سوندىقتان وسى ماسەلەگە ەرەكشە كوڭىل بولە وتىرىپ، رەسپۋبليكالىق ينسۋلت ماسەلەلەرى جونىندەگى ۇيلەستىرۋ ورتالىعىن اشتىق. رەسپۋبليكاداعى ينسۋلت قىزمەتىن دامىتۋ تۇجىرىمداماسىن ازىرلەدىك. قازاقستاننىڭ بارلىق وڭىرلەرىندە 35 ينسۋلت ورتالىعى اشىلدى. ونىڭ 19-ى - جوعارى ساپاعا سايكەس كەلەدى. ءتيىستى جۇمىستى قامتاماسىز ەتۋ ءۇشىن مامانداردى دايىنداۋ جۇرگىزىلۋدە. 2016 -جىلعى 8 ايدىڭ قورىتىندىسى بويىنشا، ينسۋلتتەن بولاتىن ءولىم- ءجىتىم دەڭگەيى 2015 -جىلعى ءتيىستى كەزەڭمەن سالىستىرعاندا، 21 پايىزعا تومەندەدى. ال وسى پاتولوگيا كەزىندەگى نەيروحيرۋرگيالىق وپەراتسيالاردىڭ سانى ايتارلىقتاي ارتتى»، - دەپ اتاپ ءوتتى ول.
س. اقشولاقوۆتىڭ جالپى بۇل دەرتتىڭ الدىن الۋعا ۇلكەن كوڭىل ءبولىنىپ كەلە جاتقاندىعىنا توقتالدى. «بۇكىلالەمدىك دەنساۋلىق ساقتاۋ ۇيىمىنىڭ مالىمەتتەرىنە سايكەس، 10 ينسۋلتتىڭ 8- ءىنىڭ الدىن الۋعا بولادى. سوندىقتان ءبىز الدىن الۋ شارالارىن كۇشەيتۋدى قولعا الۋدى جوسپارلاپ وتىرمىز. باستاماسى رەتىندە بيىل العاشقى رەت قازاقستان جىل سايىن 29 - قازاندا وتەتىن بۇكىلالەمدىك ينسۋلتپەن كۇرەس كۇنىنە قاتىستىق. بۇل كۇنى ينسۋلتتىڭ العاشقى بەلگىلەرىن تانىستىرۋ ارقىلى ۋاقتىلى دياگنوستيكا جاساۋعا جانە كومەك كورسەتۋگە مۇمكىندىك بەرەتىن كونسۋلتاتسيالار جۇرگىزىلدى. بۇل جۇمىستى ءارى قاراي جالعاستىرامىز»، - دەدى ورتالىق باسشىسى.
جالپى اتالمىش ورتالىق 8 جىل ىشىندە ورتالىق ازيادا جانە قازاقستاندا بۇرىن قولدانىلماعان 60 تان استام تەحنولوگيالاردى ەنگىزگەن. ورتالىقتا 30 مىڭعا جۋىق ناۋقاس ەمدەلىپ، 15 مىڭعا جۋىق وپەراتسيا جاسالدى. سونىڭ 70 پايىزىندا جاڭا تەحنولوگيالار قولدانىلعان. باس- مي تامىرلارىنىڭ پاتولوگياسى، پاركينسون اۋرۋى، ەپيلەپسيا، باس- ميىنىڭ جانە جۇلىن ىسىكتەرى بار ناۋقاستارعا جوعارى تەحنولوگيالىق كومەك كورسەتۋ قولعا الىندى.
«ءبىزدىڭ ورتالىقتىڭ اشىلۋىنا دەيىن ناۋقاستاردىڭ شەتەلگە بارىپ، ەمدەلۋىنە نەمەسە وسى كەسەلدىڭ اۋىرتپاشىلىعىنا كونۋگە تۋرا كەلەتىن ەدى. الەمدە العاشقىلاردىڭ ءبىرى بولىپ، 2008 -جىلى باس- مي ىسىگىن الىپ تاستاۋ، بالانى ىشتەن جارىپ الۋ وتالارى ءبىر ۋاقىتتا جۇرگىزىلە وتىرىپ، انا مەن بالانىڭ ءومىرىن ساقتاپ قالاتىن سيمۋلتاندىق وپەراتسيانى جاسادىق. مۇنداي وپەراتسيا ومىردە وتە سيرەك كەزدەسەدى. بيىل دا وسىنداي وپەراتسيانى جاسادىق. قازىرگى تاڭدا وسى انالار مەن بالالاردىڭ جاعدايلارى جاقسى»، - دەپ ءتۇيدى ءسوزىن س. اقشولاقوۆ.
ورتالىق تۇراقتى تۇردە مەديتسينالىق تەحنولوگيالاردى رەسپۋبليكانىڭ وڭىرلەرىنە ترانسفەرتتەۋدى جۇزەگە اسىرادى. سول ارقىلى قازىرگى كەزدە وڭىرلەردە 1 مىڭنان استام ناۋقاستى ەمدەۋگە مۇمكىندىك بەرەتىن 50-دەن استام تەحنولوگيالار ەنگىزىلدى.
اۆتور: جاسۇلان جولدىبايەۆ
