وڭتۇستىك سۋداندا شامامەن 40 ادام تىرىسقاق اۋرۋىنان قازا تاپتى
بۇل تۋرالى سەيسەنبى كۇنى اتالعان افريكالىق ەلدەگى دۇنيەجۇزىلىك دەنساۋلىق ساقتاۋ ۇيىمى (د د س ۇ) وكىلدەرى جاريا ەتتى، دەپ جازادى شەتەلدىك ب ا ق.
«بۇگىنگى كۇنگە دەيىن وڭتۇستىك سۋداندا كەم دەگەندە 39 ادام تىرىسقاق دەرتى سالدارىنان قازا تاپتى»، - دەلىنگەن د د س ۇ مالىمدەمەسىندە. سونىمەن قاتار، ۇيىم اقپاراتىنشا، بۇگىندە تىرىسقاق جۇقتىرۋدىڭ 1200 وقيعاسى رەسمي تۇردە تىركەلگەن.
دارىگەرلەردىڭ ايتۋىنشا، بۇل كەسەل ەل استاناسى دجۋبا قالاسىنان كورشىلەس پروۆينتسيالارعا تەز تاراپ جاتىر.
وڭتۇستىك سۋداننىڭ دەنساۋلىق ساقتاۋ مينيسترلىگى بيىل مامىر ايىنىڭ ورتاسىندا تىرىسقاق اۋرۋىنان ءبىر ادام قازا تاپقانىن مالىمدەگەن. ال، ماۋسىم ايىنىڭ سوڭىندا ەپيدەميانىڭ باستالۋى تۋرالى رەسمي تۇردە حابارلاندى. دجۋباداعى بوسقىندار لاگەرى ونىڭ وشاعىنا اينالدى.
