شىعىس قازاقستاندا سۋ تاسقىنىنان كوشىرىلگەندەر سانى 406 ادامعا جەتتى - فوتو
وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنىڭ حابارلاۋىنشا، وبلىس بويىنشا قاۋىپسىز جەرگە كوشىرىلگەن تۇرعىنداردىڭ سانى 406 ادامعا جەتكەن. ونىڭ 135 ى بالالار. «كۇشەيتىلگەن دايىندىق» رەجىمى كۇرشىم، زىريان، ۇلان، جارما اۋداندارىندا جاريالانىپ وتىر.
باسپانالارىن تاستاپ شىققان تۇرعىنداردىڭ باسىم بولىگى گلۋبوكوە اۋدانىنىڭ تۇرعىندارى. جەرگىلىكتى اكىمدىك ولارعا اۋدان ورتالىعىنداعى جاتاقحانادان، بەلوۋسوۆكا كەنتىندەگى اۋرۋحانا مەن ارگروتەحنيكالىق كوللەدجدەن، پروگرەسس جانە پرەدگورنوە اۋىلىنىڭ مەكتەپتەرىنەن ۋاقىتشا باسپانا ۇسىندى.
«ەۆاكۋاتسيالاۋ بەكەتتەرىندە زارداپ شەككەندەرگە ىستىق تاماق بەرىلۋدە. پسيحولوگ ماماندار دا مورالدىق كومەك كورسەتۋ ءۇشىن جولعا شىقتى. بارلىق سۋ العان ورىنداردا سورعىتۋ جۇمىستارى ۇزدىكسىز جۇرگىزىلىپ جاتىر» - دەلىنگەن توتەنشە جاعدايلار دەپارتامەنتى تاراتقان اقپاراتتا.
ال تاۋلى ءۇلبى ەلدى مەكەنىندە تاۋلىكتىك كۇزەت قويىلدى. «قازسەلدەن قورعاۋ» مەكەمەسى وزەن بەتىندەگى مۇزداردىڭ جىلجۋىن ءجىتى باقىلاۋدا ۇستاپ وتىر. مۇزداردىڭ كەپتەلۋى تاعى دا وزەننىڭ ارناسىنان اسۋىنا سەبەپكەر بولۋى مۇمكىن دەگەن قاۋىپ بار. قازىر تولاسسىز جاۋىن جاۋىپ، اۋا تەمپەراتۋراسى قايتادان مينۋستى كورسەتە باستادى.
