پۋتين مەن ەردوعان س-400 كەشەنىن جەتكىزۋدى تالقىلادى
پۋتين انكارادا تۇركيا پرەزيدەنتى رەجەپ تايىپ ەردوعانمەن كەلىسسوز جۇرگىزىپ، جوعارى دەڭگەيدەگى ىنتىماقتاستىق كەڭەسىنىڭ وتىرىسىنا قاتىستى. تۇركياعا پۋتينمەن بىرگە قۇرامىندا مينيسترلەر، مەملەكەتتىك كورپوراتسيالار باسشىلارى مەن ءىرى بيزنەسمەندەرى بار دەلەگاتسيا دا باردى.
بۇعان دەيىن ەكى ەل باسشىلارى تۇركيادا «روس اتوم» كومپانياسىمەن بىرگە جەرورتا تەڭىزى جاعالاۋىنان سالىناتىن العاشقى اتوم ەلەكتر ستانسياسى قۇرىلىسىن باستاۋ سالتاناتىنا قاتىستى. كەلىسسوزدەن كەيىنگى باسپا ءسوز كونفەرەنسياسىندا ەكى ەل باسشىلارى دا TurkStream گاز قۇبىرى قۇرىلىسىن اياقتاۋعا مۇددەلى ەكەنىن مالىمدەدى.
انكاراعا سونىمەن قاتار يران پرەزيدەنتى حاسسان روۋحاني دە باردى. 4 - ءساۋىر كۇنى ءۇش ەل باسشىلارى سيرياداعى داعدارىستى تالقىلايدى.
ۆلاديمير پۋتين 18 - ناۋرىزدا رەسەي پرەزيدەنتى بولىپ قايتا سايلانعاننان كەيىن العاشقى شەتەلگە ساپارىن تۇركيادان باستاپ وتىر.
رەسەي مەن تۇركيانىڭ قارىم- قاتىناسى 2015 -جىلى تۇركيالىق ۇشاق سيريا شەكاراسىنا جاقىن ماڭدا رەسەيلىك اسكەري ۇشاقتى اتىپ تۇسىرگەننەن كەيىن ۋشىعىپ كەتكەن ەدى. كەيىن ەكى ەل اراسىنداعى قارىم- قاتىناس قايتا قالپىنا كەلە باستاعان. انكارا تۇركيانىڭ جەرورتا تەڭىزى جاعالاۋىنان اككۋيۋ اتوم ەلەكتر ستانساسىنىڭ ءبىرىنشى بلوگىن سالۋ جۇمىستارىن باستاۋ ءۇشىن «روس اتومعا» قۇرىلىس ليسەنزياسىن بەرگەن.
www.azattyq.org
