تۋدى بالكونعا ءىلىپ قويعان استانالىققا 400 مىڭ تەڭگەگە جۋىق ايىپپۇل سالىندى
ول قازاقستان تۋىن ءۇش جىل بۇرىن 30 مىڭ تەڭگەگە ساتىپ العانىن ايتتى. «ءاربىر قازاقستاندىقتىڭ پاتريوت ەكەنىن كورسەتۋ ءۇشىن تۋى بولۋى كەرەك دەپ ەسەپتەيمىن. ماسەلەن، وليمپيادا، چەمپيوناتتار بولىپ، قازاقستان سپورتشىلارى جەڭگەندە بالكونعا تۋدى ءىلىپ قوياتىن ادەتىم بار. داستۇرگە اينالعان وسى ءىسىم ارقىلى قۋانىشىمدى كورسەتكىم كەلەدى. مەن جالپى ءۇش رەت وسىلاي جاسادىم - ازيادا، وليمپيادا جانە گەننادي گولوۆكين جەڭگەن كەزدەردە»، - دەدى قۇرمانبايەۆ.
ونىڭ ايتۋىنشا، 28- اقپاندا پاتەر يەلەرى كووپەراتيۆىنەن حابار كەلگەندە ول سپورت زالىندا بولعان. «ولار ماعان اۋداندىق ىشكى ىستەر دەپارتامەنتىنىڭ قىزمەتكەرلەرى كەلىپ، تۋعا بايلانىستى پروفيلاكتيكالىق اڭگىمە جۇرگىزەتىنىن ايتتى. (...) مەن كەلدىم دە ءتورت ادامدى كوردىم - ەكەۋى پوليتسەي، بىرەۋى كۋاگەر جانە استانا اكىمدىگىنىڭ ىشكى ساياسات باسقارماسىنىڭ ساراپتاما، باقىلاۋ جانە ادىستەمەلىك جۇمىس ءبولىمىنىڭ جەتەكشىسى گۇلجان ەلۋبايەۆا. ولار پاتەردە «مەملەكەتتىك سيمۆولداردى زاڭسىز قولدانۋ» بابى بويىنشا اكىمشىلىك قۇقىق بۇزۋشىلىق حاتتاماسىن تولتىردى. (...) 396400 تەڭگە ايىپپۇل سالدى. تۋ تەرەزەدەن ءىلىنىپ تۇردى، ول سابىندا بولدى»، - دەدى قۇرمانبايەۆ.
ول مۇنىمەن كەلىسپەيتىنىن ايتتى. «مەن زاڭگەرلەرگە بارىپ، بۇعان قارسى بولامىن»، - دەدى ول. قۇرمانبايەۆ بۇعان دەيىن ءوزىنىڭ مەملەكەتتىڭ اتىنان مەملەكەتتىك بارلىق دۇرىس سيمۆولدى - تۋ، ەلتاڭبا جانە ءانۇراندى جۇكتەپ قوياتىن ارنايى سايت نەمەسە پورتال جاساۋدى ۇسىنعانىن ەسكەرتتى.
ءوز كەزەگىندە استانا اكىمدىگىنىڭ ىشكى ساياسات باسقارماسىنىڭ ساراپتاما، باقىلاۋ جانە ادىستەمەلىك جۇمىس ءبولىمىنىڭ جەتەكشىسى گۇلجان ەلۋبايەۆا ايىپپۇلدىڭ زاڭناما اياسىندا سالىنعانىن ءتۇسىندىردى. «بالكوندا مەملەكەتتىك تۋدىڭ ىلىنگەنى جانە شارا قولدانۋىمىز كەرەكتىگى جايلى حابار ءتۇستى. تۇرعىنعا «مەملەكەتتىك سيمۆولداردى زاڭسىز قولدانۋ» بابى بويىنشا 200 ا ە ك كولەمىندە ايىپپۇل سالىندى. ول مەملەكەتتىك سيمۆولداردى ورنالاستىرۋ ەرەجەسىن بۇزدى، زاڭسىز قولدانۋ، ياعني بالكوندا. زاڭنامالىق تۇردە بەكىتىلگەن بەلگىلى ءبىر ەرەجەلەر بار»، - دەدى ەلۋبايەۆا.
