ق. ا. ياساۋي ۋنيۆەرسيتەتى 400 ستۋدەنتكە تۇركيانىڭ جانە ەۋروپانىڭ ۇزدىك 25 جوعارى وقۋ ورنىنان وقۋعا جولداما بەردى - فوتو
ەلباسى نۇرسۇلتان نازاربايەۆ اقوردادا وتكەن تۇركى كەڭەسىنىڭ V سامميتىندە سويلەگەن سوزىندە قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىن تۇركى الەمىنىڭ ورتاق وقۋ ورنىنا اينالدىرۋدى ۇسىنعان بولاتىن.
قازىرگى تاڭدا احمەت ياساۋي ۋنيۆەرسيتەتى قابىرعاسىندا 1200 دەن استام تۇركى دۇنيەسىنەن كەلگەن جاستار ءبىلىم الىپ جاتىر. وقۋ ورنى ءوز ميسسياسىنا ءتان جىل سايىن تۇركى الەمىنىڭ 15 ەلىنەن 28 ۇلت پەن ۇلىستىڭ ءبىلىمدى جاستارىن وقۋعا قابىلداپ كەلەدى. بۇگىندە ۋنيۆەرسيتەتتە 8000 عا جۋىق ستۋدەنت ءبىلىم الادى.
بولون ۇدەرىسىنە ەنگەن الەم ۋنيۆەرسيتەتتەرى اراسىندا اكادەميالىق ۇتقىرلىق بويىنشا ستۋدەنتتەر الماستىرۋ بۇگىندە ۇلكەن ماڭىزعا يە بولىپ وتىر. وسى رەتتە بولون ۇدەرىسىنە ەنگەن احمەت ياساۋي ۋنيۆەرسيتەتى دە جىل سايىن شەتەلدىك ۇزدىك وقۋ ورىندارىنا بىلىمگەرلەردى جىبەرىپ كەلەدى.
ولار تۇركيا رەسپۋبليكاسىنىڭ حاجەتتەپە، نەجمەتتين ەرباكان، اكدەنيز، گازي، ەرجيەس، جۋمحۋريەت، دۇزجە، كىرىككالە، ديدجلە، يالوۆا، ر. ت. ەردوگان، ۋشاك، مۋستافا كەمال، يىلدىرىم بەيازيت، ابانت يززەت بايسال، كارابيۋك، كاستامونۋ، ارداحان، احي ەۆران، بۋرسا ۋلۋداگ، ساكاريا ۋنيۆەرسيتەتتەرىنە، سونىمەن قاتار پولشا ەلىندەگى لودز ۋنيۆەرسيتەتتەرى سەكىلدى ۇزدىك سانالاتىن 25 ج و و- دا اعىلشىن جانە تۇرىك تىلدەرىندە ءدارىس تىڭدايدى. نەگىزگى مامانداقتارى مەديتسينا، گۋمانيتارلىق جانە الەۋمەتتىك عىلىمدار، جاراتىلىستانۋ ماماندىقتارى بولىپ وتىر.
اتالمىش سالتاناتتى راسىمدە ۋنيۆەرسيتەت پرەزيدەنتى، پروفەسسور ۋ. ابدىبەكوۆ: «ەل، جەر كورىپ، مادەنيەتىن تانىپ، ۇلكەن جەتىستىككە جەتىڭىزدەر. بۇنداي 400 دەن استام ستۋدەنتتى جىبەرۋ جەتىستىگى باسقا ەشقانداي وقۋ ورىندارىندا جوق. 29 ستۋدەنت ەۋروپا ۋنيۆەرسيتەتتەرىندە، 397- ءسى تۇركيا ۋنيۆەرسيتەتتەرىندە وقيدى. ءبىلىم، عىلىم توقىپ، ۇلكەن مامان يەسى بولىپ شىعۋلارىڭىزعا تىلەكتەسپىن»، - دەپ ىستىق لەبىزىن ءبىلدىردى. دامۋ جانە قارجىلاندىرۋ جونىندەگى ۆيتسە- پرەزيدەنت م. نۋرسوي دا يگى تىلەگىن ءبىلدىرىپ، ستۋدەنتتەرگە ساتتىلىك تىلەدى.
جولداماعا يە بولعان ستۋدەنتتەر اتىنان قازاق، تۇرىك، اعىلشىن تىلدەرىندە العىستار ايتىلدى. سونداي- اق، شەتەلگە وقۋعا جولداما العان بىلىمگەر اناسى گ. اعىبايەۆا اق پەيىلىمەن العىسىن ايتىپ، بارلىعىنا اق جول، ساتتىلىكتەر تىلەدى، دەپ حابارلادى اتالمىش ۋنيۆەرسيتەتتىڭ باسپا ءسوز قىزمەتىنەن.
