ستۋدەنت بانك قاتەلەسىپ اۋدارعان 4,6 ميلليون دوللاردى تولىقتاي قۇرتىپ جىبەرگەن - فوتو
بويجەتكەن اقشانىڭ قايدان كەلگەنىن تەكسەرمەستەن، ونى بىردەن قۇرتۋعا كىرىسەدى. ارتىنشا سوت وتىرىسىندا ءوز كىناسىن مويىنداماي قويادى. ونىڭ بۇل ارەكەتىن قورعاۋشىسى حيۋگو استون تولىقتاي قولداپ وتىر.
بۇل تۋرالى The Daily Mail باسىلىمى حابارلايدى.
كريستيننىڭ وتباسى قىزدارىنا قولداۋ كورسەتۋ ءۇشىن اۋسترالياعا مالايزيادان ارنايى ۇشىپ كەلگەن ەكەن. قورعاۋشى اتالعان باسىلىمنىڭ جۋرناليستەرىنە وزدەرىنىڭ پوزيتسيالارىن سوڭىنا دەيىن قورعايتىندارىن ايتقان. ياعني ەشبىر كىنانى مويىنداماي قويماق. «ونىڭ وتباسى قىزدارىن تولىقتاي قولداپ وتىر. ولار ستۋدەنت قىزدارىنا ءاردايىم اقشا جىبەرىپ وتىرعان. ءبىزدى مۇددەسى ءبىر كوماندا رەتىندە بىلە بەرسەڭىزدەر بولادى»، - دەيدى ول.
الايدا بەلگىسىز سەبەپتەرمەن ونىڭ وتباسى سەيسەنبى كۇنى بولعان سوت وتىرىسىنا قاتىسا الماي قالادى.
ال بانك ءىسىن زەرتتەۋشى مەتت ترەگونينگ سوت بارىسىندا ادىلدىك ورنايدى دەگەن ۇمىتپەن جۇرگەنىن ايتقان.
لي حانىم سوت وتىرىسىنا جىرتىق دجينسى شالبار مەن قارا مايكا كيىپ كەلگەن. بىلەگىندە جاڭادان سالىنعان تاتۋيروۆكاسى كورىنىپ تۇر. ونى مالايزياعا ۇشىپ بارا جاتقان جەرىنەن سيدنەي اۋەجايىنىڭ پوليتسياسى ۇستاپ العان ەكەن.
2014 -جىلدان باستاپ بويجەتكەن 11 اي بويى بانكتىڭ اقشاسىن قۇرتىپ كەلگەن. بۇل سوما وسى ۋاقىتقا دەيىن $4.6 ميلليونعا جەتكەن. ول، ءتىپتى، ءبىر كۇننىڭ ىشىندە سيدنەيدەگى كريستيان ديور دۇكەنىنە كىرىپ، 220,000$ اقشا قۇرتقان.
وتكەن جىلدىڭ ءساۋىر ايىندا بانك مەنەدجەرى وزدەرىنىڭ تاراپىنان جىبەرىلگەن قاتەلىكتى تۇسىنگەن. ال لي حانىم ءوز كەزەگىندە بۇل اقشانى وعان اتا-اناسى سالىپ جىبەردى دەپ ويلاپ جۇرگەنىن ايتقان. ازىرگە سوت وتىرىسىنىڭ نەمەن اياقتالعانى بەلگىسىز.
