قازاقستان - قىتاي جالپى سوماسى 4 ميلليارد دوللاردى قۇرايتىن 6 جوبا قۇرىلىسىن باستايدى

بۇل تۋرالى بۇگىن ەلوردادا ءوتىپ جاتقان ورتالىق ازيانىڭ قاۋىپسىزدىگىنە ارنالعان جىل سايىنعى وتەتىن 14- كونفەرەنسيادا ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين ءمالىم ەتتى.

«ۇزاق ۋاقىت بويى ءبىزدىڭ ەلدەرىمىز ەنەرگەتيكا جانە رەسۋرستار ءوندىرۋ سالالارىندا ىنتىماقتاستىق جاساپ كەلگەن بولاتىن. قازىرگى ۋاقىتتا «قىتاي كاسىپورىندارىن قازاقستان اۋماعىنا كوشىرۋ» دەپ اتالاتىن جوبا اياسىندا ەكونوميكانىڭ قايتا وڭدەۋ سالالارىنا باسىمدىق بەرە وتىرىپ، 51 جوبانى جۇزەگە اسىرۋ جوسپارلانعان»، - دەدى ول.

وسى رەتتە ە. قارين بۇل جوبالاردىڭ بارلىعى دا قازاقستان جەرىندە قۇرىلىسىنان باستاپ تولىق ءوندىرىس وشاعى رەتىندە قالىپتاسۋعا دەيىن جۇزەگە اسىرىلاتىندىعىن باسا ايتتى. «2016 -جىلى جالپى سوماسى 4 ميلليارد ا ق ش دوللارىن قۇرايتىن 6 جوبانىڭ قۇرىلىس جۇمىستارىن باستاۋ جوسپارلانعان. ۇلتتىق ەكونوميكا مينيسترلىگىنىڭ مالىمەتتەرىنە سايكەس، 2016 -جىلدىڭ باسىندا قازاقستان اۋماعىندا قىتايدىڭ قاتىسۋىمەن 2500 كومپانيا تىركەلگەن. ونىڭ 500 دەن استامى قازاقستاندىق- قىتايلىق بىرلەسكەن كاسىپورىن»، - دەدى ينستيتۋت ديرەكتورى.

سونىمەن قاتار ول 2015 -جىلى قازاقستان پرەزيدەنتىنىڭ قىتاي ەلىنە رەسمي ساپارى ورىن العانىن جانە ساپار قورىتىندىسىندا جالپى سوماسى 23 ميلليارد دوللاردان استام قۇجاتتار توپتاماسىنا قول قويىلعاندىعىن ەسكە سالدى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى