تالدىقورعانداعى ءبىلىم سالاسىنا قاتىستى جەمقورلىق قىلمىستارى 4-5 جىل بۇرىن باستالعان
بۇل تۋرالى جەتىسۋ وبلىسىنىڭ اكىمى بەيبىت يسابايەۆ ايتتى، دەپ حابارلايدى قازاقپارات ءتىلشىسى.
ورتالىق كوممۋنيكاتسيالار قىزمەتىندە وتكەن بريفينگى كەزىندە جۋرناليستەر وبلىس باسشىسىنان نەگە ءبىلىم سالاسىندا جەمقورلىق فاكتىلەرى جيىلەپ كەتكەنىن سۇرادى.
«تالدىقورعان قالاسىندا ءبىلىم سالاسىندا جەمقورلىق ارەكەتتەرى نەگە كوبەيىپ كەتتى دەگەن ساۋالدىڭ جاۋابىن بىرگە ىزدەيىك. بۇل تەك تالدىقورعان وبلىسىندا عانا بار دەپ ويلامايمىن. ول ەسكى ساياسي جۇيەنىڭ، ەسكى مەملەكەتتىك باسقارۋ كەزەڭىندە كوپتەگەن وڭىرلەرىمىزدە تەك قانا ءبىلىم بەرۋ ەمەس، دەنساۋلىق ساقتاۋ، مادەنيەت، قۇرىلىس، تەمىرجول، اۆتوجول سالاسىندا دا مۇنداي بىلىقتار شىعىپ جاتىر»، - دەپ جاۋاپ بەردى بەيبىت يسابايەۆ.
ونىڭ ايتۋىنشا، تالدىقورعان قالالىق ءبىلىم ءبولىمى بۋحگالتەرلەرىنىڭ جەمقورلىق ارەكەتتەرى ەرتەدە باستالعان.
«بىلتىر جەلتوقساندا بۇل تۋرالى (جەمقورلىق قىلمىسىنىڭ بەلگىلەرى - اۆتور تۇسىندىرمەسى) اقپارات الدىق. كەيىن ەشكىمگە ايتپاي، جابىق تەكسەرۋ ءجۇردى. اقىرى بارلىعى قولعا ءتۇستى. ەندى قازىر ولار ءوز كىناسىن مويىنداپ، تەرگەۋ ءجۇرىپ جاتىر. جالپى ءبىلىم سالاسىنداعى قىلمىستاردى زەرتتەپ كەلسەك، ولار كەمىندە 4-5 جىل بۇرىن باستالعان. ياعني 4-5 جىل بۇرىن جان باسىنا شاققانداعى قارجىلاندىرۋ باستالعاننان بەرى وسىنداي قىلمىستىق توپ ۇيىمداسا باستاعان»، - دەدى وبلىس اكىمى.
