ب ق و تۇرعىنى قۇنى 4,5 ميلليون استام تەڭگە تۇراتىن كيىكتى تىرىدەي ۇستاپ العان

«وحوتزووپروم» ءو ب» ر م ق ك باتىس وڭىرلىك فيليالىنان ءمالىم ەتكەنىندەي، وقيعا 31- مامىر كۇنى اقجايىق اۋدانى اۋماعىندا بولدى. چاپايەۆ- جاڭاقالا تاس جولىنىڭ دوڭگەلەك ەلدى مەكەنى بۇرىلىسىندا «نيۆا شيەۆرولە» اۆتوكولىگىن توقتاتىپ، تەكسەرگەن كەزدە ارتقى جۇك سالعىشىنان ءبىر باس كيىك تەكەسى شىقتى.

«اۆتوكولىكتە ءبىر ادام بولعان. ول كيىكتى ەلەكتر سىمىنا ورالىپ قالعان جەرىنەن تاۋىپ الدىم دەپ تۇسىندىرگەن. جۇكسالعىشتا كيىككە قوسا بۇزاۋ دا جاتقان. ونى وزىمدىكى دەگەن. اتالعان دەرەك بويىنشا ق ر ق ك 339-بابى 1-1-بولىگىنە (كيىكتى زاڭسىز قولعا ءتۇسىرۋ، جويۋ، سول سياقتى زاڭسىز قولعا تۇسىرىلگەن كيىكتى نەمەسە ونىڭ دەريۆاتتارىن، ونىڭ ىشىندە مۇيىزدەرىن يەمدەنۋ، ساقتاۋ، وتكىزۋ، اكەلۋ، اكەتۋ، جونەلتۋ، تاسىمالداۋ) سايكەس قىلمىستىق ءىس قوزعالدى»، دەپ حابارلادى ۆەدومستۆودان.

اتالعان باپ بويىنشا كىنالى دەپ تابىلعان ادام مۇلكى تاركىلەنىپ، ءۇش جىلدان بەس جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى. ب ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باس مامانى رايىمبەك شامپايەۆتىڭ ناقتىلاۋىنشا، كيىك تەكەسىنىڭ قۇنى 4 ميلليون 594,5 مىڭ تەڭگەگە باعالانادى.

«بيىلعى اۋە ساناعىنىڭ ناتيجەسى بويىنشا وبلىستاعى كيىك سانى 801 مىڭدى قۇرادى»، دەدى ر. شامپايەۆ.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى