ا ق ش-تان قازاق بالۋاندار 4 التىن، 2 كۇمىس جانە 2 قولا جۇلدە جەڭىپ الدى

 استۇرگە اينالعان دودا بيىل 28-31- قاڭتار ارالىعىندا ءوتتى. بۇل باسەكەگە قازاقستان قۇراماسىنىڭ باس باپكەرى تاڭات ساعىندىقوۆ مەيرامبەك ايناعۇلوۆ (59 كەلى) دەمەۋ جادىرايەۆ، ايبەك ەڭسەحانوۆ، ەلدار قايراتوۆ (ۇشەۋى دە 66 كەلى) اسحات دىلمۇحامەدوۆ، ماقسات ەرەجەپوۆ (ەكەۋى دە 75 كەلى) نۇرسۇلتان تۇرسىنوۆ، ازامات قىستاۋبايەۆ (ەكەۋى دە 84 كەلى) ەرۇلان ىسقاقوۆ (98 كەلى) جانە نۇرماحان تىناليەۆ (130 كەلى) سىندى بالۋاندارعا سەنىم ارتقان.

باس باپكەر ءۇمىت ارتقان بالۋانداردىڭ بارلىعى دا سەنىم ۇدەسىنەن شىقتى دەۋگە تولىق نەگىز بار. ويتكەنى باسەكەنىڭ قورىتىندىسى بويىنشا قازاقستان قۇراماسى سەگىز جۇلدە جەڭىپ، جالپى كوماندالىق ەسەپتە ءبىرىنشى ورىن الدى.

ا ق ش- تا وتكەن دودادا ءبىرىنشى التىن جۇلدەنى قورجىنىمىزعا دەمەۋ جادىرايەۆ سالدى. 66 كەلى سالماقتا سىنعا تۇسكەن وتانداسىمىز فينالدىق باسەكەدە المات كەبىسبايەۆپەن بەلدەسۋ كەرەك ەدى. ءبىراق، المات جاراقاتىنا بايلانىستى بوزكىلەمگە شىعۋدان باس تارتىپ، باس جۇلدەنى كوماندالاس ارىپتەسىنە سىيلادى.

75 كەلى سالماقتىڭ فينالىندا دا ەكى قازاقستاندىق بالۋان بەلدەسىپ، دوسجان قارتىقوۆ ماقسات ەرەجەپوۆتەن ايلاسىن اسىرىپ كەتتى. ورايى تۇسكەندە ايتا كەتەيىك، دوسجان وسىمەن ەكىنشى رەت شۋلتس مەموريالىنىڭ جەڭىمپازى اتانىپ وتىر.

 98كەلىدە ەرۇلان ىسقاقوۆقا تەڭ كەلەر ەشكىم بولمادى. فينالدىق بەلدەسۋدە وتانداسىمىز كىلەم يەسى سەيلور ۋيليامستى جەڭسە، اسا اۋىر سالماقتا بەلدەسەتىن نۇرماحان تىناليەۆ اقتىق ايقاستا داۆيد ارەندتتى ۇتتى.

ال، قازاقستان قۇراماسىنىڭ قورجىنىنا بۇل دودادا قولا جۇلدەنى 59 كەلىدە سىنعا تۇسكەن مەيرامبەك ايناعۇلوۆ پەن 85 كەلىدە ونەر كورسەتكەن نۇرسۇلتان تۇرسىنوۆ سالدى.

اۆتور: ۋاليحان قوسانباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى