ابزال قۇسپان قاڭتار وقيعاسىنا قاتىسۋشىلاردىڭ 3 توبىن اتادى
بۇل تۋرالى ءماجىلىستىڭ جالپى وتىرىسىندا «امانات» قوعامدىق كوميسسياسىنىڭ ءتوراعاسى ابزال قۇسپان ايتتى، دەپ حابارلايدى قازاقپارات ءتىلشىسى.
«امانات» كوميسسياسى 2022 -جىلدىڭ 22-قاڭتاردان باستاپ، جىل سوڭىنا دەيىن ءوز قىزمەتىن اتقارىپ كەلدى. كوميسسيا قۇرامى نەگىزىنەن ادۆوكاتتار مەن قۇقىق قورعاۋشىلاردان تۇردى. سونىمەن قاتار ۋاكىلەتتى مەملەكەتتىك ورگانداردان وكىلدەر كىردى. تەرگەۋ يزولياتورلارىنا كىرۋدى، قىلمىستىق ءىس قۇجاتتارىمەن تانىسۋدى جەرگىلىكتى پروكۋراتۋرا ورگاندارى قامتاماسىز ەتتى. ءبىز قاڭتار وقيعاسىنا قاتىسۋشىلاردى شارتتى تۇردە 3 توپقا ءبولىپ قاراستىردىق.
ءبىرىنشىسى - ۇيىمداستىرۋشىلار. ەكىنشىسى - ارانداتۋشىلار. ءۇشىنشىسى - ارانداپ قالعاندار. ياعني، ءاۋ باستا بەيبىت ميتينگى دەپ شىعىپ، ۇيىمداستىرۋشىلار مەن ارانداتۋشىلاردىڭ ايتاعىنا ەرىپ، ءارتۇرلى سيپاتتاعى قۇقىق بۇزۋشىلىق جاساعاندار. نەگىزگى ادامدار سانىن وسى ءۇشىنشى توپ قۇرادى جانە ءبىزدىڭ كوميسسيا وسى توپپەن ماقساتتى تۇردە جۇمىس جاسادىق. وسى ءبىر جىلدىڭ ىشىندە ءوز باسىم جانە كوميسسيا مۇشەلەرى باسقا شارۋالارعا مويىن بۇرماستان تەك قانا قاڭتار ماسەلەسىمەن اينالىستىق»، - دەدى تانىمال ادۆوكات.
ونىڭ اتاپ وتۋىنشە، كوميسسيا العاشقى جۇمىسىن 24-قاڭتار كۇنى الماتى قالاسىندا تەرگەۋ يزولياتورىنا كىرىپ، قامالعانداردىڭ جاعدايىمەن جەكە تانىسۋدان، ىسكە قاتىستى مالىمەتتەردى ءوز اۋىزدارىنان ەستىپ، ولاردىڭ تۋىستارىمەن، ادۆوكاتتارىمەن، سونىمەن قاتار ەلگە بەلگىلى قوعام قايراتكەرلەرىمەن كەزدەسىپ، قالالىق پروكۋراتۋرا ارقىلى قىلمىستىق ىسپەن تانىسۋدان باستاعان.
«ناتيجەسىندە كوميسسيا ءبىرىنشى كۇنى-اق ونداعان ادامدى قاماۋدان بوساتۋعا ىقپال ەتتى. ولار نەگىزىنەن قاڭتار وقيعاسى كەزىندە الاڭدا جاراقات العان ازاماتتار بولاتىن. ول جۇمىس كەيىن تاراز، تالدىقورعان، شىمكەنت، سەمەي قالالارىندا جالعاسىن تاۋىپ، قىلمىستىق ىستەر بويىنشا قاماۋعا الىنعان 1600 دەي ادامنىڭ 600 گە جۋىعىنىڭ باس شاراسىن وزگەرتۋگە تىكەلەي ىقپال ەتتىك. ول جاعداي قوعام تاراپىنان وڭ باعاسىن الىپ، ادىلدىككە، ءادىل تەرگەۋگە دەگەن ەلدىڭ سەنىمىن وياتتى دەۋگە تولىق نەگىز بار»، - دەدى ابزال قۇسپان.
