تۇركىستان وبلىسىندا ءوز جۇمىس ورنىنا ۇرلىققا تۇسكەن كۇدىكتى 3 جىلعا سوتتالدى
وقيعا تامىز ايىندا جەتىساي اۋدانىندا ورىن العان. ءوز جۇمىس ورنىنا ۇرلىققا تۇسكەن جىگىت، كاسسادان 6 ميلليون تەڭگەنى قولدى قىلعان.
پوليتسەيلەردىڭ تەرگەۋ ارەكەتتەرى بارىسىندا، كۇدىكتىنىڭ بۇرىن سول جەردە جۇك تاسۋشى بولىپ جۇمىس ىستەگەنى انىقتالدى. ول سول كۇنى قويما ىشىنە كىرىپ، 5 ساعاتتاي جۇمىسشىلاردىڭ ۇيىنە قايتقانىن كۇتىپ وتىرعان. ىشتە ەشكىمنىڭ قالماعانىنا كوز جەتكىزگەننەن سوڭ سۋسىندار قويماسىنىڭ تەرەزەسىنەن كاسساعا ءوتىپ، 6 ميلليون تەڭگەنى سومكەسىنە سالىپ الىپ كەتكەن.
«اتالعان ءىس بويىنشا جان-جاقتى تەكسەرۋ شارالارىن اتقارىپ، دالەلدەمەلەردى جيناقتاعان پوليتسەيلەر ءىس قۇجاتتارىن ايىپتاۋ اكتىسىمەن بىرگە سوتقا جولدادى. ناتيجەسىندە سوت ۇكىمىمەن 23 جاستاعى كۇدىكتى ق ر ك ق-نىڭ 188-بابى 3-بولىگىمەن كىنالى دەپ تانىلىپ، وعان قاتىستى 3 جىل 3 اي مەرزىمگە باس بوستاندىعىنان شەكتەۋ جازاسى تاعايىندالدى» - دەلىنگەن تۇركىستان وبلىسى پوليتسيا دەپارتامەنتى تاراتقان اقپاراتتا.
