قازاقستاندا 3 ميلليون توننا ءسۇت ونىمدەرى تاپشىلىعى بار - دەپۋتات
«مەملەكەتتىك قولداۋ ازىق-تۇلىك يمپورتىن ازايتۋعا تىكەلەي اسەر ەتەدى. رەسمي ستاتيستيكاعا سۇيەنسەك، قازاقستاندا جىل سايىن شامامەن 6,3 ميلليون توننا ءسۇت وندىرىلەدى. ونىڭ 1,6 ميلليون تونناسى ءسۇت ونىمدەرىن جاساۋعا جۇمسالادى. اتالعان كولەمنىڭ 1 ميلليون تونناسىن وتاندىق ءىرى شارۋاشىلىقتار جۇزەگە اسىرادى. دەگەنمەن ءسۇت ونىمدەرىنىڭ يمپورتىنا تاۋەلدىلىك ماڭىزدى ماسەلە كۇيىنشە قالىپ وتىر. ماسەلەن، جىل سايىن ەلگە 600 مىڭ توننا ءسۇت ونىمدەرى اكەلىنەدى. قازىر ناقتى تاپشىلىق - جىلىنا كەمىندە 3 ميلليون توننانى قۇرايدى. سوندىقتان ءسۇت جانە ءسۇت ونىمدەرى فەرمالارى ءۇشىن مەملەكەتتىك قولداۋ كولەمىنىڭ قىسقارۋى يمپورتقا تاۋەلدىلىكتىڭ وسۋىنە الىپ كەلەدى. ال قۇس شارۋاشىلىعىندا يمپورتقا تاۋەلدىلىك %70 عا جەتتى. جۇمىرتقادان باستاپ تاۋىقتىڭ بالاپانىنا دەيىن سىرتتان اكەلىنىپ جاتىر»، - دەدى ءماجىلىس دەپۋتاتى اسقاربەك ۇيسىمبايەۆ دوڭگەلەك ۇستەل بارىسىندا.
حالىق قالاۋلىسى يمپورتقا تاۋەلدىلىكتى ازايتۋ كەرەك دەپ سانايدى.
«اۋىل شارۋاشىلىعى سالاسىن سۋبسيديالاۋ الەۋمەتتىك ماڭىزى بار ازىق-تۇلىكتىڭ باعاسىنا تىكەلەي اسەر ەتەدى. وسى ورايدا سۋبسيديا ماسەلەسىنىڭ الەۋمەتتىك ماڭىزى زور. ءبىز سالا ماماندارى مەن اكىمدىكتەردىڭ ۇسىنىسىن تىڭدادىق. ونىڭ ناتيجەسى - مەملەكەتتىك قولداۋسىز فەرمەرلەر جۇمىس جاساي المايدى، اسىرەسە قازىرگى ەكونوميكالىق داعدارىس جاعدايىندا»، - دەيدى ول.
بۇعان دەيىن حابارلاعانىمىزداي، قازاقستاندا سۋبسيديالاۋ پروتسەسى تاياۋ ارادا ەلەكتروندى فورماتقا كوشەدى.
