الماتىدان شەتەلگە 3 كەلى التىندى الىپ كەتپەك بولعان قىتاي ازاماتى ۇستالدى
باسىلىم مالىمەتىنشە، كونتراباندا مەملەكەتتىك باقىلاۋدى اينالىپ ءوتىپ، كولىك پوليتسياسىنىڭ لاۋازىمدى تۇلعالارىنا پارا بەرۋ ارقىلى جۇزەگە اسىرىلعان.
الماتى قالاسىنىڭ حالىقارالىق اۋەجايىندا كولىكتەگى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرىنە كەدەندىك جانە شەكارالىق باقىلاۋ ايماعى ارقىلى «سالەمدەمەنى» الىپ ءوتۋى ءۇشىن 600 ا ق ش دوللارى سوماسىندا پارا بەرۋ ارەكەتى كەزىندە قازاقستان رەسپۋبليكاسىنىڭ ازاماتى ۇستالدى. جەكە تەكسەرۋ بارىسىندا ودان 1200 ا ق ش دوللارى تاركىلەندى.
جەدەل-ىزدەستىرۋ شارالارىن جۇرگىزۋ ناتيجەسىندە اۋەجاي عيماراتىندا قىتاي ازاماتى ۇستالدى، ول كۇدىكتى سىبايلاسى بولا وتىرىپ، التىندى اۋە ارقىلى الماتىدان دۋبايعا جەتكىزۋى كەرەك بولعان. ونىڭ سومكەسىنەن پوليتسيا قىزمەتكەرلەرى سالماعى 3 كەلى 200 گرام التىن قۇيمالارىن تاپتى. ونىڭ قۇنى شامامەن 84 ميلليون تەڭگەدەن اسادى.
تەرگەۋ سوتىنىڭ سانكسياسىمەن قازاقستاندىق كۇدىكتىنىڭ تۇرعىلىقتى جەرى بويىنشا الماتىداعى كوتتەدجدەردىڭ بىرىنە ءتىنتۋ جۇرگىزىلدى. وندا قۇيمالارداعى التىن مەن مەتالدىڭ مولشەرىن انىقتايتىن ەلەكتروندىق تارازى مەن ارنايى قۇرىلعىلار تاركىلەندى.
قازىرگى ۋاقىتتا كۇدىكتىلەردى ۋاقىتشا ۇستاۋ يزولياتورىنا قاماۋ تۋرالى ماسەلە شەشىلىپ جاتىر. تەرگەۋ قىمبات مەتالدىڭ شىعۋ كوزىن جانە قىلمىستىق توپتىڭ باسقا دا سىبايلاستارىن انىقتاپ جاتىر.
