اتىراۋدا 3 ادامدى اتىپ ولتىرگەن كۇدىكتىنىڭ ەكى تاپانشاسى تابىلدى
بۇدان بۇرىن اتىراۋدا اتىستان ءۇش ادام مەرت بولىپ، بىرەۋى اۋرۋحاناعا تۇسكەنىن جازعان ەدىك. وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اتىس 15-ناۋرىزدا ساعات 22:10 شاماسىندا بولعان. اتىراۋ قالاسىنىڭ «اۆانگارد-3» شاعىن اۋدانىنداعى ايالدامادا تاپانشادان اتىلعان وقتان 27 جانە 23 جاستاعى ەكى جىگىت قازا تاپقان.
ال، 1995 -جىلعى 1 ەر ادام اۋرۋحاناعا جەتكىزىلگەن. جەدەل-تەرگەۋ توبى وقيعا ورنىندا تەرگەۋ جۇرگىزۋ كەزىندە تاعى ءبىر ادامنىڭ مۇردەسىن تاپقان. تەكسەرۋ كەزىندە ونىڭ 27 جاستاعى ەر ادام ەكەنى انىقتالعان. كۇدىكتى وقيعا ورنىنان بوي تاسالاپ قاشىپ كەتكەن.
كەيىن پوليتسيا قىزمەتكەرلەرى اتالعان قىلمىسقا كۇدىكتى رەتىندە ماڭعىستاۋ وبلىسىنىڭ 1993 -جىلعى تۋماسىن ۋاقىتشا ۇستاۋ يزولياتورىنا قاماۋعا الدى. قازىر كۇدىكتىگە قاتىستى ق ر قىلمىستىق كودەكسىنىڭ 99-بابىنىڭ 2-بولىگىمەن تەرگەۋ امالدارى جۇرگىزىلىپ جاتىر.
«كۇدىكتى ۇستالعان كەزدە تاپانشاسى بولماعان ەدى. پوليتسەيلەر جەدەل ىزدەستىرۋ ءىس-شاراسىن جۇرگىزىپ، 19-ناۋرىزدا تەرەكتىڭ تۇبىنەن ەكى تاپانشانى تاپتى. تاپانشالار اتىس بولعان شاعىن اۋداندا ءوسىپ تۇرعان تەرەكتىڭ ءبىرىنىڭ تۇبىنە جاسىرىلعان. قازىر ەكى تاپانشا ساراپتاماعا جولداندى»، - دەپ حابارلادى دەپارتامەنتتىڭ باسپا ءسوز قىزمەتى.
