بيىل سولتۇستىك قازاقستانعا 3 مىڭنان استام ادام قونىس اۋدارادى
جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى سەرگەي ياكوۆەنكو اكىمدىكتە وتكەن وتىرىستا ءوڭىر 3,4 مىڭنان استام ادامدى قابىلداۋدى جوسپارلاپ وتىرعانىن جەتكىزدى. سونىڭ 385- ءى ورالماندار، قالعانى وڭتۇستىك قازاقستان، جامبىل، الماتى جانە قىزىلوردا وبلىستارىنان قونىس اۋداراتىندار.
قازىرگە دەيىن وڭىرگە 50 وتباسى قونىس اۋدارعان. ولار ەكونوميكالىق دامۋ الەۋەتى جوعارى جانە ورتاشا ەلدى مەكەندەرگە ورنالاستىرىلىپ جاتىر. وبلىس اكىمى قۇمار اقساقالوۆ الەۋەتى تومەن اۋىلدار ءتىپتى قاراستىرىلمايتىنىن ايتتى.
كەلگەندەردىڭ جارتىسى - بالالار. قونىس اۋدارعانداردىڭ دەنى 35-40 جاس ارالىعىندا. 26 ادام جۇمىسقا ورنالاسقان، 24- ءى دەكرەتتە، ەكى ايەل ءۇي شارۋاسىمەن اينالىسادى، توعىز ادام جەكە كاسىپكەرلىكپەن اينالىسپاق، ال 28 ادام ازىرگە جۇمىسسىز.
«بىزدە جەر جەتەدى. قوسىمشا شارالار جاسالدى، بارلىق تاۋار وندىرۋشىلەرمەن شارتتار جاسالدى. جۇمىس بەرۋشىنىڭ ءوزى بارىپ، كوشۋدى قالايتىندارمەن اڭگىمەلەسۋى ءتيىس. ول جۇمىسقا الاتىنىن ايتۋى كەرەك. اكىم ولارعا بولىنەتىن ۇيلەردى كورسەتۋى ءتيىس»، - دەدى قۇمار اقساقالوۆ.
س. ياكوۆەنكو مامىر ايىندا سولتۇستىك قازاقستاندىق دەلەگاتسيا وڭتۇستىك وڭىرلەرگە باراتىنىن جەتكىزدى.
«قونىس اۋدارۋشىلاردىڭ قۇجاتتارىن رەتتەۋگە كەتەتىن ۋاقىت 50 كۇننەن 10 كۇنگە دەيىن قىسقارتىلدى. كەم دەگەندە 5 ادامدى قابىلداعان جۇمىس بەرۋشىگە ءاربىر جاڭا جۇمىسكەر ءۇشىن 450 ا ە ك مولشەرىندە سۋبسيديا بەرىلەدى. قازىر وسىنى ويلاستىرىپ جاتىرمىز»، - دەدى ول.
ءوڭىر باسشىسى اۋداندارداعى جۇمىس ورىندارى مەن باسپانا ماسەلەسىن دە قوزعادى. «جەر جەتەدى. قوسىمشا شارالار قارالعان، بارلىق اۋىلشارۋاشىلىق وندىرىسشىلەرىمەن كەلىسىم جاسالعان. تۇرعىندار سانى ازايعانى دۇرىس جاعداي جاسالماعانىن كورسەتەدى. تەك 5 اۋداننىڭ عانا اكىمدەرى قونىس اۋداراتىن ادامدارمەن كەزدەسكەن. ادامدار باسقا وڭىرلەردەن كەلىپ جاتىر. ولارمەن كەزدەسىڭدەر، كومەكتەسىڭدەر، تۇيتكىلدى ماسەلەلەرىن شەشىپ بەرىڭدەر»، - دەدى ق. اقساقالوۆ.
وبلىس اكىمى بىلتىر كەلگەن 12 وتباسى كوشىپ كەتكەنىن ايتتى. ولار دەنساۋلىعىن، كليماتتىق جاعدايلاردى سەبەپ ەتىپ كورسەتكەن. ءبىراق ءوڭىر باسشىسى ماسەلە باسقا جاقتا ەكەنىنە سەنىمدى ەكەنىن ايتىپ، ءار ماسەلەنىڭ جەكە شەشىمىن ىزدەۋدى تاپسىردى.
