اقمولا وبلىسىندا 3 التىن وندىرەتىن كەن ورىن اشىلدى
ەلىمىزدە جىل سايىن ءساۋىر ايىنىڭ ءبىرىنشى جەكسەنبىسىندە گەولوگتاردىڭ كاسىبي مەرەكەسى اتالىپ وتىلەدى. بۇعان اقمولالىقتاردا ءوز ۇلەستەرىن قوسۋدا. بۇل جولى سالتاناتتى شاراعا قاتىسقان اقمولا وبلىسى اكىمىنىڭ ورىنباسارى قانات ىدىرىسوۆ ەل يگىلىگىن ەسەلەۋگە بارىنشا ۇلەس قوسىپ كەلە جاتقان سالا ماماندارىن مەرەكەلەرىمەن قۇتتىقتاپ، ارداگەرلەر مەن ەڭبەك وزاتتارىن ماراپاتتادى.
«سىزدەردىڭ ەڭبەك جولدارىڭىز جاستارعا ۇلگى. تىنىمسىز ەڭبەكتەرىڭىزدىڭ ارقاسىندا بۇگىندە وبلىسىمىزدىڭ اۋماعىندا كوپتەگەن كەن ورىندارى اشىلدى. بۇل ءوڭىرىمىزدىڭ ەكونوميكالىق وسۋىنە وڭ ىقپال تيگىزىپ جاتقانى ءسوزسىز»، - دەدى قانات ىدىرىسوۆ.
سونىمەن قاتار، ول وتكەن جىلى اقمولا، قوستاناي، سولتۇستىك قازاقستان وبلىستارىندا كوپ تارالعان قاتتى پايدالى قازبالاردى گەولوگيالىق بارلاۋ جۇمىستارىنا 7,8 ميلليارد تەڭگە قارجى ينۆەستيتسيالانعانىن، 2017-جىلدىڭ سوڭىندا بەستوبە، جولىمبەت كەنتتەرى مەن اقسۋ اۋىلىندا التىن وندىرەتىن كەن ورىندارى اشىلعانىن اتاپ ءوتتى.
گەولوگيا سالاسىن دامىتۋعا جانە ەلىمىزدىڭ مينەرالدىق-شيكىزات قورىن ارتتىرۋعا قوسقان ەلەۋلى ۇلەسى ءۇشىن «سوكولوۆكا» اكتسيونەرلىك قوعامىنىڭ تەحنيكالىق باسشىسى ورىندىق نۇرماعامبەتوۆ، «كوكشەتاۋ گيدروگەولوگيا» اكسيونەرلىك قوعامىنىڭ تەحنيك-گەوفيزيگى ساندىبەك بۇركىتبايەۆ «جەر قويناۋىن بارلاۋدىڭ ۇزدىگى»، «ۆارۆارينسكوە» اكسيونەرلىك قوعامىنىڭ باس گەولوگى دميتري كارتسيەۆ «جەر قويناۋىنىڭ قۇرمەتتى بارلاۋشىسى» توسبەلگىلەرىمەن ماراپاتتالسا، «سولتۇستىك قاز جەر قويناۋى» ءوڭىرارالىق دەپارتامەنتىنىڭ گيدروگەولوگى گالينا پياتوۆاعا «ەڭبەك ارداگەرى» مەدالى تابىستالدى.
سونىمەن قاتار، ءبىرقاتار سالا ۇزدىكتەرى قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ قۇرمەت گراموتاسىمەن، وبلىس اكىمىنىڭ العىس حاتىمەن ماراپاتتالدى.
