قاراعاندى وبلىسىندا 3 اۋىلدىڭ اتاۋى وزگەرەدى
ەلدى مەكەندەردىڭ اتاۋىن وزگەرتۋ شەشىمى ولاردىڭ اتاۋلارىنىڭ يدەولوگيالىق تۇرعىدا ەسكىرۋىندە بولىپ وتىر.
قاراعاندى وبلىستىق تىلدەردى دامىتۋ باسقارماسىنىڭ جەتەكشىسى گۇلنارايىم قاڭتاربەكوۆانىڭ مالىمەتىنشە، كوشەلەردىڭ اتاۋلارىن اۋىستىرۋ - اۋقىمدى شارا جانە ول بۇكىل رەسپۋبليكا بويىنشا ءجۇرىپ جاتىر.
«اۋىل تۇرعىندارىنىڭ كەلىسىمىمەن كيەۆكا اۋىلى نۇرا، دالني اۋىلى - امانقوڭىر، شەرباكوۆسكوە اۋىلى - قاينار بولىپ وزگەرتىلەدى»، - دەدى گۇلنارايىم قاڭتاربەكوۆا.
سونىمەن قاتار پريوزەرسك قالاسىنداعى سەنترالنايا كوشەسى - تاۋەلسىزدىك، پيونەرسكايا كوشەسى - اقمامىق، ناگورنايا كوشەسى كوكجيەك بولىپ وزگەرەدى. ال، پريمورسكي كوشەسىنە - بايتەرەك، پريوزەرنايا كوشەسىنە - كوكتەڭىز، نوۆايا كوشەسىنە - قورجىنتۇبەك، پەسچانايا كوشەسىنە - ناۋرىز اتاۋلارى بەرىلىپ، بۋلۆار سوۆەسكوي ارمي - جەڭىس بۋلۆارى بولادى.
اتالعاندارمەن قوسا، ساتبايەۆتاعى № 6-شاعىن اۋدان نۇرلى مەكەن دەپ اتالادى.
دەپۋتاتتار اۋىلدار مەن كوشەلەردىڭ اتاۋلارىن اۋىستىرۋ تۋرالى ۇسىنىستى ءبىراۋىزدان قولدادى. كوشەلەر مەن اۋىلدارداعى اتاۋلار جازىلعان جازۋلاردى وزگەرتۋگە قانشا قارجى جۇمسالاتىنى تۋرالى ازىرگە ەشتەڭە ايتىلمايدى. جاقىن كۇندەردە دەپۋتاتتار قابىلداعان قاۋلى ادىلەت ورگاندارىندا تىركەلەدى.
