ەلوردا ماڭىندا 3 يندۋستريالىق ايماق قۇرىلادى
«ەلوردانىڭ قارقىندى دامۋى، دەموگرافيالىق سىيىمدىلىق، ءوڭىر حالقى تىعىزدىعىنىڭ ءوسۋى، كوشى- قون اعىمى، رەسۋرستىق قور اگلومەراتسيالىق دامۋدىڭ العىشارتىن قۇرايدى. سونىمەن قاتار حالىق سانىنىڭ وسۋىمەن، كولىك پروبلەمالارىنىڭ كوبەيۋىمەن جانە قورشاعان ورتانىڭ ناشارلاۋىنا بايلانىستى قالا ماڭى ايماعىنىڭ ماسەلەسى ارتىپ تۇر. باسقارىلاتىن ۋربانيزاتسيانى دامىتۋ جانە ەكونوميكانى ءارتاراپتاندىرۋ ءۇشىن قولدا بار رەسۋرستاردى ەسكەرە وتىرىپ، وسى پروتسەستەردى مەملەكەتتىك قالا قۇرىلىسىنىڭ رەتتەۋى تالاپ ەتىلەدى»، - دەدى مينيستر.
ونىڭ ايتۋىنشا، استانا اگلومەراتسياسىنىڭ اۋماعىنا استانا قالاسى، اقمولا وبلىسىنىڭ ارشالى، سەلينوگراد، شورتاندى اۋداندارى جانە اقمولا وبلىسى اقكول اۋدانىنىڭ 4 وكرۋگى كىرەدى. اگلومەراتسياعا بارلىعى 124 ەلدى مەكەن جاتادى. اگلومەراتسيا حالقىنىڭ سانى 2016 -جىلى 1,2 ميلليون ادامدى قۇرايدى جانە 2030 -جىلعا قاراي 1,6 ميلليون ادامعا دەيىن جەتەدى دەپ بولجانۋدا. ءوسىم 33 پايىزدى قۇرايدى. بۇل سيفر وزگەرۋى دە مۇمكىن. جالپى الاڭى 21770 شارشى شاقىرىمدى قۇرايدى. سونىڭ ىشىندە استانا قالاسى - 800 شارشى شاقىرىم. اگلومەراتسيانىڭ جالپى اۋماعىنان 7,5 مىڭ شارشى شاقىرىمدى قۇرايتىن قارقىندى دامۋ ايماعى جەكە بولىنگەن. ونىڭ نەگىزگى باعىتتارى - يندۋستريالىق ايماقتاردى قۇرۋ، ءوندىرىستى ءارتاراپتاندىرۋ»، - دەدى ول.
سونداي- اق، جەڭىس قاسىمبەكتىڭ سوزىنە قاراعاندا، رەكرەاتسيانى دامىتۋ مەن ازىق- تۇلىكتى دامىتۋ ايماعى بولىنگەن. بۇل ەلدى مەكەندەر استانامەن تىعىز بايلانىستا. تاريحي جاعىنان ماكرو ءوڭىر اۋىل شارۋاشىلىققا ماماندانۋمەن سيپاتتالادى. سوندىقتان استانا اگلومەراتسياسى اتقاراتىن قىزمەتتىڭ ءبىرى استانا ءۇشىن ازىق- تۇلىك بەلدەۋى قىزمەتىن اتقارۋ بولىپ تابىلادى.
ونىڭ پايىمىنشا، سالانى ءارتاراپتاندىرۋ جانە قارقىنداتۋ ەسەبىنەن اۋىل شارۋاشىلىعى ونىمدەرىن ءوندىرۋ 170 پايىزعا ۇلعايادى. استانا قالاسىنىڭ ازىق- تۇلىككە، ونىڭ ىشىندە ۇنعا، قاراقۇمىققا، سۇتكە، بۇرشاق داقىلدارىنا، قۇس ەتىنە جانە تاعى باسقا ونىمدەرگە دەگەن قاجەتتىلىگى اگلومەراتسيا اۋماعى ەسەبىنەن تولىق قامتاماسىز ەتىلەتىن بولادى.
«اگلومەراتسيا وزەگىنىڭ بەتون، تەمىربەتون كىرپىش، قيىرشىقتاس، مەتالل كونسترۋكتسيالارى، اعاش بۇيىمدارى سياقتى قۇرىلىس ماتەريالدارىنا سۇرانىستى اگلومەراتسيا اۋماعىندا ورنالاسقان كاسىپورىندار تولىقتاي قامتاماسىز ەتەتىن بولادى»، - دەدى جەڭىس قاسىمبەك.
«كونترماگنيتتەر مەن يندۋستريالىق ايماقتاردى قۇرۋ استانانى حالىق سانى جاعىنان ءبىراز «جەڭىلدەتىپ»، سىرتقى كوشى- قون اعىندارىن وزىنە «تارتۋعا» مۇمكىندىك بەرەدى. نەگىزگى كولىك دالىزدەرى بويىنشا قونىستاندىرۋ ارنالارى مەن قالالار ايقىندالدى - ارشالى كەنتى، شورتاندى كەنتى مەن جايناق ستانسياسى نەگىزىندەگى كونترماگنيتتەر. سونىمەن قاتار كونترماگنيتتەر رەتىندە اقكول قالاسى مەن اقمول اۋىلى انىقتالدى. ولار وزەك- قالادان قاشىق ورنالاسقان جانە كوشى- قون اعىمدارىن وزىنە تارتاتىن جەتكىلىكتى رەسۋرستارى بار. حالىقتىڭ ەركىن قوزعالىسى، وزەكتىڭ كەلەشەگى بار ءوسىم نۇكتەلەرىمەن بايلانىسى نەگىزگى ماگيسترال جولداردىڭ كومەگىمەن قامتاماسىز ەتىلۋى ءتيىس. ءوندىرىس پەن قاجەتتى وندىرىستىك ينفراقۇرىلىمنىڭ كونترماگنيت جانە سەرىكتەس ەلدى مەكەندەردە شوعىرلانۋى وزىق قارقىنمەن ءوسىپ كەلە جاتقان اۋماقتاردى قالىپتاستىرۋعا مۇمكىندىك بەرەدى، ولار ارشالى اۋدانىنىڭ ارشالى، شورتاندى اۋدانىنىڭ توڭكەرىس جانە سەلينوگراد اۋدانىنىڭ جايناق يندۋستريالىق ايماقتارى بولماق. بۇل ونەركاسىپ ءونىمى ءوندىرىسىنىڭ 144 پايىزعا ءوسۋىن قامتاماسىز ەتەدى»، - دەدى مينيستر.
اۆتور: مارلان جيەمباي
