الماتىدا ەلباسى سىنىنان سوڭ ءال- فارابي داڭعىلىنان جوعارى ايماقتا 3 قاباتتان ارتىق نىسان سالىنبايدى

جيىنعا اۋدان اكىمدەرى، قالالىق قۇرىلىس جانە ساۋلەت باسقارماسىنىڭ، قۇرىلىسشى كومپانيالاردىڭ وكىلدەرى، ساۋلەتشىلەر مەن ديزاينەرلەر قاتىستى.

«تاۋلى ايماق رەكرەاتسيالىق ايماق بولادى. ول جەردە قۇرىلىس سالىنبايدى. اۋماعى 6,5 گ ا بولاتىن ءال- فارابي داڭعىلىنان جوعارى اۋماق قالانىڭ ستراتەگيالىق اۋدانى. تاجىريبە كورسەتكەندەي، قازىرگى 6 قابات دەگەن شەكتەۋىمىز از بولىپ تۇر. بۇل قالاعا سامال جەلدىڭ سوعۋىنا كەدەرگى ەكەن. قابات سانىن رەتتەۋدە، ساۋلەت جوسپارلاۋ باعىتىندا ءسال قاتتىراق كريتەريلەر كەرەك»، - دەدى قالا باسشىسى.

 جيىن بارىسىندا ءال- فارابي داڭعىلىنان جوعارى ايماقتا نىسانداردى سالۋدىڭ جاڭا رەگلامەنتى تاعايىندالدى. جاڭا رەگلامەنتكە سايكەس عيماراتتىڭ بيىكتىگى 3 قاباتتان اسپاۋى كەرەك. تومەنگى (سوكولنىي) قاباتتى سالۋعا رۇقسات بەرىلەدى. ءبىراق بيىكتىگى 12 مەتر بولۋى، كەڭدىگى 15 مەتر بولۋى ءتيىس.

سونداي- اق، تاۋلى ايماقتار مەن تاۋ بوكتەرىندە قۇرىلىس جۇرگىزۋگە تىيىم سالىنادى.

 ايتا كەتۋ كەرەك، مەملەكەت باسشىسى الماتىعا ساپارى بارىسىندا ءال- فارابي داڭعىلىنان جوعارى ورنالاسقان عيماراتتاردىڭ ەكولوگيالىق احۋالعا كەلتىرىپ جاتقان زالالىن تىلگە تيەك ەتكەن بولاتىن. ەلباسى قالاعا تاۋدان سوعاتىن سامالدىڭ ماڭىزدىلىعىن ەسكەرتتى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى