ناۋرىزدىڭ 3 - كۇنى «سىرعالىم» تەلەحيكاياسىنىڭ ەكىنشى ماۋسىمى كورەرمەنگە جول تارتادى

سەريال ۇلتتىق ارنانىڭ تاپسىرىسىمەن «كوركەم فيلم» كينوستۋدياسىندا ءتۇسىرىلدى. ەكىنشى كەزەڭدى تۇسىرۋگە 3,5 اي ۋاقىت جۇمسالدى.

سەريال اۆتورلارىنىڭ ايتۋىنشا، جاڭا كەزەڭدە كورەرمەندەردى جاڭا كەيىپكەرلەر - ليديا كادەنوۆا مەن ساكەن راقىشەۆ كۇتىپ تۇر.

قويۋشى رەجيسسەر راشيد سۇلەيمەنوۆ «سىرعالىم» سەريالىندا باستى ماقسات يدەولوگيالىق ناسيحات ەكەندىگىن اتاپ ءوتتى.

«ارينە، سىرت پىشىنىنەن يدەولوگيالىق ماقسات كورىنىس بەرمەيدى. سول ارقىلى ءبىز ءوز كورەرمەندەرىمىزدىڭ ساناسىندا دۇرىس قۇندىلىقتاردى قالىپتاستىرۋعا تالپىنىپ جاتىرمىز. بۇل قالا مەن اۋىلدىڭ بىرىگۋى، ەتنوستاردىڭ بىرىگۋى. قازاق ءتىلىن ناسيحاتتاۋ - باستى مىندەت. «قازاقستان» ارناسىنىڭ تىڭعىلىقتى جۇمىسىنىڭ ارقاسىندا بىزدە قازاق ءتىلى بارىنشا ساحناعا بەيىمدەلگەن. ءتۇسىرىلىم الاڭىندا ەكى رەداكتور جۇمىس جاسايدى، ولار قازاق ءتىلىنىڭ دۇرىس قولدانىلۋىن قاداعالايدى. سەريالدا قازاق ءتىلىنىڭ ساۋاتتى قولدانىلاتىنىن بىلىكتى لينگۆيستەر دە ايتىپ وتىر. بۇل - ءبىز ءۇشىن ۇلكەن ماقتانىش»، - دەدى رەجيسسەر.

ءبىرىنشى ءبولىم 2014-جىلدىڭ باسىندا كورسەتىلدى. جاڭا سەريالدى 1 ميلليونعا جۋىق ادام تاماشالادى. كەيىن «سىرعالىم» سەريالى «2014-جىلدىڭ ۇزدىك سەريالى» اتالىمىن، ال باستى ءرولدى سومداعان اكتريسا جۇلدىز ماحانوۆا «ەڭ ۇزدىك اكتريسا» اتاعىن جەڭىپ الدى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى