ن. نازاربايەۆ: ۇلتتىق قوردان الداعى ءۇش جىل ىشىندە جىل سايىن 3 ميلليارد دوللار بولىنەدى
بۇگىن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسىنان كەيىن قازاقستان حالقىنا ارناعان جولداۋىندا مەملەكەت باسشىسى نۇرسۇلتان نازاربايەۆ وسىلاي مالىمدەدى.
«الەمدىك ەكونوميكاداعى احۋال داعدارىس جاعدايىندا كەز- كەلگەن مەملەكەتتىڭ دىتتەگەن مەجەسىنە قوسىمشا قاراجات شىعىنداماي جەتۋى ايتارلىقتاي كۇردەلى ەكەنىن كورسەتىپ وتىر. بۇل رەتتە كەزىندە ۇلتتىق قوردىڭ نە ءۇشىن قۇرىلعانىن قاپەرلەرىڭىزگە سالعىم كەلەدى. بۇنىڭ باستى مىندەتى - تۇراقتى الەۋمەتتىك- ەكونوميكالىق دامۋدى قامتاماسىز ەتۋ، ەكونوميكانى سىرتقى جايسىز جاعدايلاردان قورعاۋ بولاتىن. ءدال ءقازىر ءبىزدىڭ وسى قورىمىزدى قاجەتكە جاراتاتىن كەز كەلدى. بۇل رەتتە، قازاقستان وزگە ەلدەردىڭ قاتەلىكتەرىن قايتالاماي، ەكونوميكالىق ءوسىم ءۇشىن ىشكى قورىن بارىنشا پايدالانۋعا ءتيىس» ، - دەدى ن. نازاربايەۆ.
سونىمەن قاتار، ەلباسى ەلدىڭ جيناقتالعان نەسىبەسى بۇگىنگىدەي كۇردەلى احۋال بارىسىندا حالىقتىڭ جاعدايىن قيىنداتپاۋ ءۇشىن ۇنەمدى تۇردە جۇمسالاتىنىن باسا ايتتى.
«سوندىقتان دا، مەن ۇلتتىق قوردان 2015-2016-2017 - جىلدار ارالىعىندا جىل سايىن 3 ميلليارد دوللارعا دەيىن ءبولۋ تۋرالى شەشىم قابىلدادىم. ۇكىمەتكە اپتا ىشىندە وسى ۇلتتىق قوردان قاراجاتتى بولۋگە قاتىستى ءتيىستى شەشىم قابىلداۋدى تاپسىرامىن. ءتيىستى قاراجاتتار الداعى 2015 - جىلدىڭ بيۋدجەتىندە ەسكەرىلۋى ءتيىس. سونىمەن قاتار، ۇكىمەت ۇلتتىق قور قاراجاتىن ءتيىمدى پايدالانۋدى قامتاماسىز ەتۋى كەرەك. مەنىڭ تاپسىرماممەن وسى ماقساتتار ءۇشىن قۇرىلعان كوميسسيا قاراجاتتىڭ ءتيىمدى جۇمسالۋىن قاداعالايتىن ءارى ماعان باياندايتىن بولادى. بۇل جەردە بارلىق دەڭگەيدەگى ءاربىر اكىمگە، «نۇر وتان» پارتياسىنىڭ فيليالدارىنا ەرەكشە جاۋاپكەرشىلىك جۇكتەلەدى» ، - دەدى ن. نازاربايەۆ.
اۆتور: قانات مامەتقازى ۇلى
