شەكارادان ءوتۋ كەزىندە تاۋار قۇنىن جالعان كورسەتكەندەردەن 38 ميلليارد تەڭگە ءوندىرىلدى

بۇل تۋرالى ورتالىق كوممۋنيكاتسيالار قىزمەتىندەگى بريفينگىدە مەملەكەتتىك كىرىستەر كوميتەتى ءتوراعاسىنىڭ ورىنباسارى باقىتجان سلياموۆ ايتتى، دەپ حابارلايدى قازاقپارات ءتىلشىسى.

«بيىلعى جىلى تاۋارلاردىڭ ە ا ە و كەدەندىك شەكاراسى ارقىلى ءوتۋىن باقىلاۋدى ءبىر جەردە بىرىكتىرۋ جانە احۋالدىق ورتالىق پەن ەلەكتروندى دەكلاراتسيالاۋ ورتالىعىنىڭ بازاسىندا باس ديسپەتچەرلىك باسقارما قۇرىلدى.

احۋالدىق ورتالىق - ناقتى ۋاقىت رەجيمىندە پۋنكتىلەردەگى تاۋارلاردىڭ رەنتگەن-سۋرەتتەرىن تالداۋدى جانە كەدەندىك جەتە تەكسەرۋلەر جۇرگىزۋ پروتسەسىن سۇيەمەلدەۋدى جۇزەگە اسىرادى.

ال، ەلەكتروندى دەكلاراتسيالاۋ ورتالىعى - تاۋارلار شىعارىلعانعا دەيىن تاۋارلاردىڭ قۇنىن باقىلاۋدى، جەڭىلدىكتەر مەن پرەفەرەنتسيالاردى قولدانۋدىڭ نەگىزدىلىگىن جانە باقىلاۋ اياقتالعاننان كەيىن كەدەندىك دەكلاراتسيالاردى شىعارۋدى جۇزەگە اسىرادى.

جالپى، جىل باسىنان بەرى احۋالدىق ورتالىق 4,5 مىڭ زاڭ بۇزۋشىلىقتى انىقتادى. 15,5 ميلليارد تەڭگە سوماسىندا كەدەندىك تولەمدەر ءوندىرىلدى. كەدەندىك تەكسەرۋلەردىڭ تيىمدىلىگى 2 ەسەگە ارتتى.

ەلەكتروندى دەكلاراتسيالاۋ ورتالىعى قۇرىلعان ساتتەن باستاپ قوسىمشا 38 ميلليارد تەڭگە سوماسىندا كەدەندىك تولەمدەر مەن سالىقتار ءوندىرىلدى»، - دەپ توقتالدى باقىتجان سلياموۆ.

بۇدان وزگە، كوميتەت ءتوراعاسىنىڭ ورىنباسارى بۇگىننەن باستاپ قىتايمەن شەكاراداعى «دوستىق» اۆتوموبيل وتكىزۋ پۋنكتىندە ەلەكتروندى كەزەك جۇيەسى ىسكە قوسىلاتىنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى