ەلوردادا دەمالىس كۇندەرى ماس كۇيدە 38 جۇرگىزۋشى ۇستالدى - پوليتسيا

«ماس جۇرگىزۋشى - قىلمىسكەر» اتتى جەدەل الدىن الۋ شارالارىنىڭ ناتيجەسىندە جول ەرەجەسىن بۇزعان 743 ادام ۇستالعان. ونىڭ 38 جاعدايىندا جۇرگىزۋشىلەردىڭ ماس كۇيدە كولىك ايداعانى انىقتالعان. كوممۋنالدىق ايىپ تۇراعىنا 49 كولىك جەتكىزىلگەن.

«ماسەلەن جەكسەنبى كۇنى تۇنگى ساعات ەكى جارىمدا پاترۋلدى پوليتسيا ناريادى ناجىمەدەنوۆ پەن ش. قالداياقوۆ كوشەسىنىڭ قيىلىسىندا «گاز 3302» اۆتوكولىگىن توقتاتتى. اۆتوكولىك تىزگىنىندەگى 18 جاستاعى جىگىتتىڭ ماس ەكەنى بەلگىلى بولدى. جاس جىگىت مەديتسينالىق كۋالاندىرۋدان ءوتتى. ناركولوگ-دارىگەردىڭ قورىتىندىسى بويىنشا جۇرگىزۋشى جەڭىل دارەجەدە ماس بولعان»، - دەپ حابارلايدى قالالىق پوليتسيا دەپارتامەنتىنەن.

ۇستالعان جۇرگىزۋشىلەرگە قاتىستى اكىمشىلىك كودەكستىڭ 608-بابى 1-بولىگى (جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ) بويىنشا اكىمشىلىك حاتتاما تولتىرىلىپ، ولاردىڭ كولىكتەرى كوممۋنالدىق ايىپ تۇراعىنا اكەتىلدى. سوت قاۋلىسىنا سايكەس ولاردىڭ ءبارى كولىكتى 7 جىلدان 15 جىلعا دەيىن جۇرگىزۋ قۇقىعىنان ايىرىلدى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى