استانادا 38 «جاسىرىن» مەملەكەتتىك قىزمەت انىقتالدى

بۇل تۋرالى بۇگىن استانا قالالىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل دەپارتامەنتىنىڭ باسشىسى تىلەگەن كاسكين ءمالىم ەتتى، دەپ حابارلايدى قازاقپارات.

«ۇلت جوسپارىن جۇزەگە اسىرۋ ماقساتىندا دەپارتامەنت جەرگىلىكتى اتقارۋشى ورگانداردىڭ بارلىعىنىڭ جەمقورلىق تاۋەكەلدەرىنە سىرتتاي ساراپتاما جۇرگىزدى. ناتيجەسىندە جەمقورلىقتىڭ 303 تاۋەكەلى، ونىڭ ىشىندە 38 «جاسىرىن» مەملەكەتتىك قىزمەت انىقتالىپ، دەپارتامەنت مەملەكەتتىك ورگانداردىڭ ءبىرىنشى باسشىلارىنا انىقتالعان بۇزۋشىلىقتاردى جويۋ بويىنشا 176 ۇسىنىس جىبەردى»، - دەدى ول.

ماسەلەن، ونىڭ اتاپ وتۋىنشە، دەپارتامەنتتىڭ ۇسىنىسىمەن «تۇرعىن ءۇي قۇرىلىسىنا ۇلەسكەرلىك قاتىسۋ تۋرالى» ق ر زاڭىنا وزگەرتۋلەر ەنگىزىلدى. ول ەلىمىزدىڭ بارلىق ۇلەسكەر ازاماتتارىنىڭ قۇقىعىن قورعاۋعا سەپتىگىن تيگىزىپ، ۇلەسكەرلىك قۇرىلىسقا سالىنعان قارجىلاي اقشانى جوعالتۋ تاۋەكەلىن ءبىرشاما تومەندەتتى.

«استانا قالاسى بويىنشا مەملەكەتتىك قىزمەت كورسەتۋلەرگە جۇرگىزىلگەن ساراپتاما 7,3 ميلليوننان استام مەملەكەتتىك قىزمەتتىڭ كورسەتىلگەنىن انىقتادى. بۇل وتكەن جىلدىڭ سايكەس كەزەڭىمەن سالىستىرعاندا 40 پايىزعا ارتىق. ونىڭ ىشىندە حالىققا قىزمەت كورسەتۋ ورتالىقتارى ارقىلى 1,3 ميلليون، «ەلەكتروندىق ۇكىمەت» پورتالى ارقىلى 1,3 ميلليون قىزمەت كورسەتىلگەن. تولىقتاي العاندا، مەملەكەتتىك قىزمەتتەر تۋرالى زاڭنامانىڭ ساقتالۋىن باقىلاۋعا ىرىكتەلگەن 7 تەكسەرۋ جۇرگىزىلىپ، 8804 فاكتى بويىنشا 19 بۇزۋشىلىق انىقتالدى، 14 لاۋازىمدى تۇلعا جاۋاپكەرشىلىككە تارتىلدى»، - دەدى كاسكين.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى