قازاقستاندا بۇگىنگە دەيىن جۇرەكتى اۋىستىرىپ سالۋ بويىنشا 38 وتا جاسالدى - س. بەركىنبايەۆ
فورۋم جۇمىسىنا الىس جانە جاقىن شەتەلدىڭ عالىمدارى، قازاقستان رەسپۋبليكاسىنىڭ بارلىق ايماقتارىنىڭ دەنساۋلىق ساقتاۋ ۇيىمدارىنىڭ جەتەكشىلەرى، باس ماماندار، كارديولوگتار، اريتمولوگتار جانە ينتەرۆەنتسيالىق كارديولوگتار - بارلىعى 400 گە جۋىق ادام قاتىسۋدا.
بۇگىن وسى اۋقىمدى فورۋمعا بايلانىستى ارنايى باسپا ءسوز ءماسليحاتى ۇيىمداستىرىلدى.
«فورۋم بارىسىندا پلەنارلىق وتىرىستاردان باسقا، مەديتسينا سالاسىنا ەنگىزىلگەن جاڭا يننوۆاتسيالىق تەحنولوگيالار جايىندا شەت ەلدىك مامانداردىڭ قاتىسۋىمەن تاجىريبەلىك ماقساتتا شەبەرلىك سىنىپتارى وتكىزىلىپ جاتىر. ەلىمىزدە سوڭعى جىلدارى كارديولوگيا، كارديوحيرۋرگيا سالاسى جاقسى دامۋدا. مىسالى، 2007 -جىلعا دەيىن ەلىمىزدە بار بولعانى 2 كلينيكادا عانا وسى باعىتتا وتالار جاسالىپ كەلدى. ناتيجەلەرى كوڭىل كونشىتپەيتىن. سول سەبەپتەن ادامدار شەت ەلدەرگە بارىپ وتا جاساتىپ ءجۇردى. ال، بۇگىندە ەلىمىزدە وسى سالاعا قاتىستى وتالاردىڭ بارلىعى دەرلىك ءتۇرى جاسالادى. كۇنى بۇگىنگى دەيىن قازاقستاندا جۇرەكتى اۋىستىرىپ سالۋ بويىنشا 38 ناتيجەلى وتا جاسالدى. سونداي- اق، قازاقستاندا جۇرەك- قان تامىرلارى اۋرۋىنان بولاتىن ءولىم- ءجىتىم دە ازايدى. ەگەر، 2006 -جىلى 100 مىڭ تۇرعىنعا 526 ءولىم-ءجىتىم وقيعاسى تىركەلگەن بولسا، بۇگىندە بۇل كورسەتكىش - 200 گە جۋىق قانا. ەندى الداعى ۋاقىتتا ءولىم- ءجىتىمنىڭ ازايۋى نەگىزىنەن الدىن الۋ ادىستەرىنە بايلانىستى بولادى. بۇل جەردە تۇرعىندار دا بەلسەندىلىك تانىتۋلارى ءتيىس»، - دەدى ءوز سوزىندە ق ر كارديولوگتار قاۋىمداستىعىنىڭ پرەزيدەنتى، مەديتسينا عىلىمدارىنىڭ دوكتورى، پروفەسسور ءسالىم بەركىنبايەۆ.
سەزد جانە ەكى كونگرەسستىڭ جۇمىسى 17 -ماۋسىمعا دەيىن جالعاسادى. وسى ۋاقىت ارالىعىندا قاتىسۋشىلار كارديولوگيالىق قىزمەتتى ۇيىمداستىرۋ ماسەلەلەرىن، نەگىزگى جۇرەك- قان تامىرلارى اۋرۋلارىن دياگنوستيكالاۋدى جانە ەمدەۋدىڭ جاڭا تاسىلدەرىن، ينتەرۆەنتسيالىق كارديولوگياداعى، كلينيكالىق ەلەكتروفيزيولوگياداعى جانە ينتەرۆەنتسيالىق اريتمولوگياداعى جاڭالىقتاردى، سونداي- اق، نەگىزگى كارديولوگيالىق اۋرۋلاردان كەيىنگى وڭالۋ جانە ولاردىڭ الدىن الۋ جولدارىن تالقىعا سالادى. فورۋم باعدارلاماسىنا 140 تان استام بايانداما وقىلادى.
فورۋمنىڭ سوڭىندا قازاقستانداعى كارديولوگيالىق جانە تەراپيالىق قىزمەتتى جەتىلدىرۋدىڭ جولدارى، دەنساۋلىق ساقتاۋ سالاسىنىڭ نەگىزگى ماسەلەلەرى بويىنشا قارار قابىلدانادى.
ايتا كەتەلىك، شارا بارىسىندا دارىلىك زاتتاردىڭ، دياگنوستيكالىق ەمدىك جابدىقتاردىڭ، زاماناۋي اقپاراتتىق تەحنولوگيالاردىڭ جانە مەديتسينالىق مامانداندىرىلعان باسىلىمداردىڭ كورمەسى اشىلدى.
ءىس- شارالاردى ۇيىمداستىرۋشىلار: ق ر دەنساۋلىق ساقتاۋ جانە الەۋمەتتىك دامۋ مينيسترلىگى، «ق ر د س م كارديولوگيا جانە ىشكى اۋرۋلار عىلىمي- زەرتتەۋ ينستيتۋتى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورىن، ق ر كارديولوگتار قاۋىمداستىعى، قازاقستاندىق اريتمولوگتار قاۋىمداستىعى، قازاقستاندىق ينتەرۆەنسيالىق كارديولوگتار جانە رەنتگەن حيرۋرگتاردىڭ قاۋىمى.
اۆتور: ايبوتا جاپپاربەرگەن
