ءۇي الىپ بەرەم دەپ بىرنەشە ادامدى الداعان الاياق ايەل 37 ايعا سوتتالدى

اتىراۋ قالالىق پوليتسيا باسقارماسىنىڭ تەرگەۋشىسى، پوليتسيا اعا لەيتەنانتى نۇربولات ەرسۇلتاننىڭ مالىمەتىنشە، جەرگىلىكتى ازاماتشا بىرنەشە ادامدى الداعان.

«الدىمەن بىلتىرعى تامىزدا تانىسىنا اتىراۋ قالاسىنداعى نۇرسايا شاعىناۋدانىنان 3 بولمەلى پاتەر الىپ بەرۋگە ۋادە ەتىپ، 800 مىڭ تەڭگە اقشاسىن العان. كەيىن قاراشادا تاعى ءبىر ازاماتشامەن تانىسىپ، وعان دا 4 بولمەلى پاتەر الىپ بەرەمىن دەپ 495 مىڭ تەڭگەسىن العان. بۇدان سوڭ بيىلعى قاڭتاردا WhatsApp جەلىسىندە جەر تەلىمىنىڭ جارناماسى ارقىلى جەرگىلىكتى ازاماتپەن تانىسقان. سول ازاماتقا «سامال» شاعىن اۋدانىنان جەر تەلىمىن الۋعا كومەكتەسۋ ءۇشىن 750000 تەڭگە سۇراعان» - دەيدى نۇربولات ەرسۇلتان.

ونىڭ ايتۋىنشا، الاياق ايەلگە قاتىستى ق ر قىلمىستىق كودەكسىنىڭ 190-بابىنىڭ 3-بولىگى، 4-تارماعىمەن تەرگەۋ امالدارى جۇرگىزىلىپ، ءىس سوتقا جولداندى. سوت شەشىمىمەن الاياق ايەلگە 3 جىل 1 ايعا باس بوستاندىعىنان ايىرۋ جازاسى تاعايىندالدى. سوتتالۋشى جابىرلەنۋشىلەرگە كەلگەن زالالدى وتەپ بەرۋى ءتيىس.

«تومەن باعامەن، نەمەسە كەزەكتەن تىس ءۇي الىپ بەرەمىن دەگەن الاياقتار كوبىنە ءوزىن مەملەكەتتىك قىزمەتشى رەتىندە تانىستىرىپ، جابىرلەنۋشىلەردىڭ سەنىمىنە كىرەدى. ءتىپتى بولاشاقتا الاتىن ءۇيدى كورسەتەدى. وزگە ادامدارعا وسىنداي ءۇي الىپ بەرگەنى تۋرالى وتىرىك ايتادى. مۇنداي الاياقتاردىڭ قۇربانى بولماس ءۇشىن اكىمشىلىككە نە بولماسا «ازاماتتارعا ارنالعان ۇكىمەت مەملەكەتتىك كورپوراتسياسى» ك ە ا ق جەرگىلىكتى فيليالىنا جۇگىنۋ قاجەت. سونداي- اق، الدىن الا تولەم جاساۋعا جول بەرمەگەن ءجون» - دەيدى نۇربولات ەرسۇلتان.

ەسكە سالا كەتەلىك، بۇدان بۇرىن اتىراۋدا 20 جاستاعى الاياق ءۇش جىل بويى ءماجبۇرلى ەڭبەككە تارتىلاتىنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى