جاپون جاستارىنىڭ 37 پايىزدان استامى وتباسىن قۇرعىسى كەلمەيدى
ساۋالناما 20 مەن 39 جاس ارالىعىنداعى 7 مىڭ قىز- جىگىتتىڭ اراسىندا 2 اي بويىنا جۇرگىزىلگەن.
جاستار ماماندار قويعان ءتۇرلى سۇراقتارعا عالامتور جانە پوشتا ارقىلى جاۋاپ بەرگەن. ولاردىڭ 60 پايىزدان كوبى شاڭىراق كوتەرۋدى قالايتىنىن جەتكىزگەن. ال ومىرلىك سەرىگىن تابۋدان قاشاتىندار بەرىلگەن بىرنەشە ىقتيمال سەبەپتىڭ اراسىندا ءبىرىنشى كەزەكتە «ماحاببات دەگەن ماشاقات» دەگەن جاۋاپتى تاڭداعان. ودان كەيىنگىلەرى «ءوزىمنىڭ سۇيىكتى ىسىممەن اينالىسقىم كەلەدى» دەگەن پايىمىن جەتكىزگەن. ال ۇشىنشىلەرى «جۇمىس ىستەۋدى نەمەسە ءبىلىم العاندى قالايمىن» ، - دەپ جاۋاپ بەرگەن.
بۇگىندە جاپون قوعامى ءۇشىن قارتايۋ مەن تۋۋ دەڭگەيىنىڭ قىسقارۋى وسى ەلدىڭ سالماقتى الەۋمەتتىك- ەكونوميكالىق پروبلەماسىنا اينالعان. جەرگىلىكتى حالىقتىڭ 80 پايىزىن سوعىستان سوڭ تۋعاندار قۇرايدى. جاپونيانىڭ ءاربىر سەگىزىنشى تۇرعىنى جاسى 75 تەن اسقان قارت ادامدار.
جاپوندىق جاستار ۇيلەنىپ، ءۇي بولعىسى كەلمەسە، بىزدە كەرىسىنشە اجىراسۋ ماسەلەلەرى جيىلەپ بارادى. «ۇيلەنۋ - وڭاي، ءۇي بولۋ - قيىن» ەكەنىن وسىدان- اق بىلۋگە بولادى. دەرەككە سۇيەنسەك، وتكەن جىلى ەلىمىز بويىنشا 52 مىڭ وتباسى نەكەسىن بۇزعان كورىنەدى. ولاردىڭ اجىراسۋ سەبەپتەرى ءارقيلى. جالپى ەلىمىزدە اجىراسۋ ماسەلەسى 2013 -جىلدان باستالسا كەرەك. بۇلاي دەيتىنىمىز، ءدال وسى جىلى رەسپۋبليكا بويىنشا 40 مىڭنان استام جۇپتىڭ ءدام- تۇزى جاراسپاعان. وتباسى - وتاننىڭ شاعىن بولىگى. سوندىقتان بۇل ماسەلە كىم- كىمدى دە ويلاندىرماي قويماسى انىق؟! پسيحولوگتاردىڭ پايىمداۋى بويىنشا، قازىر كوبىنە اجىراسقىسى كەلەتىن جۇپتاردىڭ 60 پايىزىن ورتاداعى بالاسى ۇستاپ قالادى ەكەن. سەبەبى بالا - وتباسىنداعى اتا- انانىڭ دانەكەرى.
www.khabar.kz
