باتىس قازاقستاندا 379 بالا ءوسىپ كەلە جاتقان 212 قولايسىز وتباسى تىركەلگەن
بۇل تۋرالى وبلىس اكىمىنىڭ ورىنباسارى مارات توقجانوۆتىڭ ءتوراعالىق ەتۋىمەن وتكەن ب ق و اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى وبلىستىق كوميسسيانىڭ كەزەكتى وتىرىسىندا ايتىلدى، دەپ حابارلايدى قازاقپارات.
ب ق و ىشكى ساياسات باسقارماسى باسشىسىنىڭ مىندەتىن اتقارۋشى دارحان قادىراليەۆتىڭ بايان ەتكەنىندەي، اتاپ ايتقاندا، «مەرەيلى وتباسى» ۇلتتىق بايقاۋىنىڭ وبلىستىق كەزەڭى، «ايەلدەر كوشباسشى مەكتەبى»، «وتباسىلىق قۇندىلىقتاردى ناسيحاتتاۋ جانە وتباسى ينستيتۋتىن دامىتۋ بويىنشا ءىس- شارالار وتكىزۋ» جوبالارى ۇكىمەتتىك ەمەس ۇيىمداردىڭ قاتىسۋىمەن جۇزەگە اسىرىلدى.
وبلىس اكىمىنىڭ ورىنباسارى مارات توقجانوۆتىڭ اتاپ وتكەنىندەي، 2006-2016 -جىلدارعا ارنالعان گەندەرلىك تەڭدىك ستراتەگياسى بۇدان ون جىل بۇرىن قابىلدانعانىمەن، كەيبىر باسشىلار جەرگىلىكتى جەردە بۇل جۇمىستى ءوز دەڭگەيىندە اتقارىپ وتىرعان جوق. ستراتەگيادا بارلىق باعىتتار ناقتى كورسەتىلگەنىمەن، ول تولىق ورىندالماي وتىر. «ءۇمىت» ورال ءوڭىرى ايەلدەرى وداعى» قوعامدىق بىرلەستىگىنىڭ ءتورايىمى ءاليا رايىمقۇلوۆانىڭ سوزىنە قاراعاندا، گەندەرلىك تەڭدىك باعىتىندا وڭىردە ىلگەرىلەۋ بولعانىمەن، بيلىكتەگى ايەلدەر ۇلەسى 30 پايىزعا جەتە قويعان جوق. سوڭعى بەس جىل بويى 25-30 ادام «ايەلدەر كوشباسشى مەكتەبىندە» وقىعانىمەن، ولاردىڭ بىردە-ءبىرى ءبىرىنشى باسشى ورىنتاعىنا جايعاسا العان جوق.
جيىندا سونداي-اق جاڭاقالا اۋدانى اكىمىنىڭ ورىنباسارى ايزادا شۇكىرعاليەۆا اۋداندىق كوميسسيانىڭ جۇمىسى جونىندە ەسەپ بەردى. وتىرىستا قوعامدا ايەل- انانىڭ مارتەبەسىن كوتەرۋمەن بىرگە ۇرپاق تاربيەسىندە اكەنىڭ رولىنە ماڭىز بەرۋ كەرەكتىگى اتاپ كورسەتىلدى. اسىرەسە، وتباسىلىق قۇندىلىقتاردى بەلسەندى ناسيحاتتاۋ كەرەك. ويتكەنى وتباسىنداعى تۇرمىستىق زورلىق- زومبىلىق، ماسكۇنەمدىك، جاس ءوسپىرىم قىزداردىڭ جۇكتى بولىپ قالۋى سياقتى ماسەلەلەر ءالى وتكىر كۇيىندە.
مىسالى، وبلىستىق دەنساۋلىق ساقتاۋ باسقارماسىنىڭ مالىمەتىنە قاراعاندا، بيىل 15-18 جاستاعى 117 ەكىقابات قىز ەسەپكە الىنسا، سونىڭ 60 ى نارەستەلى بولعان، 10 ى جۇكتىلىگىن ۇزگەن. سوندىقتان بۇل باعىتتا مەديتسينا قىزمەتكەرلەرى مەن مۇعالىمدەردىڭ باسىن بىرىكتىرىپ، ءبىلىم بەرۋ مەكەمەلەرىندە تۇسىنىك جۇمىستارىن كەڭىنەن جۇرگىزۋ قاجەت. ب ق و ىشكى ىستەر دەپارتامەنتى جەرگىلىكتى پوليتسيا قىزمەتىنىڭ باسشىسى ماناربەك عابدۋلليننىڭ ايتۋىنشا، وبلىستا 379 بالا ءوسىپ كەلە جاتقان 212 قولايسىز وتباسى تىركەلگەن. بۇل جەردە دە قۇقىق قورعاۋ ورگاندارى، ءبىلىم بەرۋ مەن دەنساۋلىق ساقتاۋ سالاسى قىزمەتكەرلەرىنىڭ بىرلەسكەن قىزمەتى كەرەك.
اۆتور: ەلجان ەرالى
