الەۋمەتتىك وسال توپقا جاتپايتىن 373 مىڭ ادام باسپانا كەزەگىندە تۇر

يندۋستريا جانە ينفراقۇرىلىمدىق دامۋ ۆيتسە- ءمينيسترى ەركەبۇلان داۋىلبايەۆتىڭ قازاقپارات ساۋالىنا جولداعان جاۋابىندا وسىنداي مالىمەت ايتىلعان.

«2022 -جىلدىڭ 9-قاراشاسىنداعى جاعداي بويىنشا جەرگىلىكتى اتقارۋشى ورگانداردا تۇرعىن ءۇي كەزەگىندە تۇرعان ازاماتتاردىڭ سانى - 622840. سونىڭ ىشىندە حالىقتىڭ الەۋمەتتىك جاعىنان وسال توپتارىنا جاتاتىن ازاماتتاردىڭ سانى - 249881»، - دەلىنگەن ۆيتسە- ءمينيستردىڭ جاۋابىندا،

ءمينيستردىڭ ورىنباسارى «7-20-25» باعدارلاماسىنىڭ ورنىنا ۇسىنىلعان جاڭا يپوتەكانى «جۇمىسشى ورتا توپقا ارنالعان» باعدارلاما رەتىندە سيپاتتاپ وتىر.

«يپوتەكالىق نەسيەلەۋدى سۋبسيديالاۋ ءونىمى جۇمىسشى ورتا توپقا ارنالعانىن اتاپ وتكەن ءجون. سونىمەن قاتار، حالىقتىڭ الەۋمەتتىك جاعىنان وسال توپتارى ءۇشىن قولدانىستاعى تۇرعىن ءۇي جاعدايلارىن جاقسارتۋعا باعىتتالعان مەملەكەتتىك قولداۋ شارالارىن پايدالانۋعا قۇقىلى»، - دەپ جازادى ەركەبۇلان داۋىلبايەۆ.

ەسكە سالا كەتەيىك، مينيسترلىك جاڭا يپوتەكالىق باعدارلامانىڭ شارتتارىن «اشىق ن ق ا» پورتالىندا جاريالاپ، كوپشىلىك تالقىسىنا ۇسىنعان بولاتىن.

ۆيتسە- ءمينيستردىڭ مالىمەتى بويىنشا، بۇيرىق جوباسى بۇگىندە ۇلتتىق ەكونوميكا جانە قارجى مينيسترلىكتەرىنىڭ كەلىسىمىن الماعان.

«الداعى ۋاقىتتا جوعارىدا اتاپ وتكەن مينيسترلىكتەر كەلىسىمىن بەرگەن جاعدايدا، بۇيرىق جوباسى ادىلەت مينيسترلىگىنەن تىركەۋدەن ءوتىپ، قازاقستان رەسپۋبليكاسى قارجى مينيسترلىگىنىڭ قارجىلاندىرۋىنان سوڭ وتىنىشتەر ازاماتتاردان قابىلداناتىن بولادى»، - دەيدى ءمينيستردىڭ ورىنباسارى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى